Kulumbaisha 37 - Baibo Busansulushi Bwa Libuku Ili

Musena wa bamucita shibi awa bacita shibotu

Lwiimbo lwakwe Defedi.

¹ Utanoolisukama ceebo ca bamucita shibi, nabi kukumbwa camunyono kubaabo bacita shibiibi.

² Ceebo balaakuloba coonoono bweenka buloba bwiisu. Ncakwiila bweenka buloba shishango.

³ Cinka manungo muMwaami Lesa akucita shibotu. Lyalo ulaakukonsha kwikala mucishi ici kakutaaku cakulisukama.

⁴ Kosangalala muMwaami Lesa, lakwe ulaakukupa nshoolila mumoyo.

⁵ Lyaabe mumaansa a Mwaami Lesa, cinka manungo muli nguwe alakwe ulaakukucafwa.

⁶ Ncakwiila ulaakulengesha bululami bwako kuboneka patuba, bulaakubonekesha bweenka mbuli lisuba mbolibala.

⁷ Kokalika caamba pameenso akwe Lesa akulindila lucafwo lwakwe. Utalisukami abantu basumpuka kwiinda munshila shabo beene, ee, bantu abo baswitilila kwiinda mumiyeeyo yabo ibiibi.

⁸ Talamuka kukwaanga mikonya, ee, leka kukalala, utapengi amoyo ceebo ico cilaletela mapensho.

⁹ Ceebo bamucita shibi balaakunyonyoolwa. Sombi abo balangila lucafwo kuswa kuMwaami Lesa balaakubwesa cishi.

¹⁰ Cakufwambaana bamucita shibi balaakushimingana, Mulaakweelesha kubalangoola, sombi teshi mukababoneewo.

¹¹ Sombi balibombya balaakwikala mucishi cakashomeshekwa, kwikala cakusangalala muluumuno akuswitilila.

¹² Bamucita shibi balapinga kucaya baluleme, balalumanya meeno kubukali pali mbabo.

¹³ Nakubi boobo bantu abo Mwaami Lesa ulabaseka, ceebo ulibwene ayi bushiku bwakunyonyoolwa kwabo buli munshila.

¹⁴ Bamucita shibi balasomona mipeeni yabo akweeleka mata abo, kwaamba ayi bacaye bakandu, bataaku mbobabete alimwi abaabo beenda cabululami.

¹⁵ Ono mipeeni yabo ilaakumana kubacaya beene, aalo mata abo alaakumana kutyoloolwa.

¹⁶ Buboni buniini bwa muntu ululeme buleenda bwa bamucita shibi boonse.

¹⁷ Mukwiinga Mwaami Lesa ulaakuuma bamucita shibi mumanungo ayi bamane nkusu, sombi baluleme ulabeemikanina akubafuninina.

¹⁸ Mwaami Lesa ulalama bantu abo banyumfwila alimwi cishi nceshi bakapekwe cilaakunooli cabo kwamuyayaya.

¹⁹ Teshi bakapengeewo nabibo muciindi cibiibi. Muciindi ca nsala balo balaakunoocite shakulya shiinji.

²⁰ Sombi bamucita shibi balaakumana kufwa. Ee, balwani ba Mwaami Lesa balaakuloba anga ngamaluba a muluundu, ncakwiila balaakushimingana bweenka mbuli bwiishi.

²¹ Bamucita shibi balakongola akwaalilwa kuboosha, sombi bantu kabotu balaaba shintu kumoyo kakutuba.

²² Ceebo abo bapetwe coolwe kuMwaami Lesa balaakupekwa cishi. Sombi abo Mwaami Lesa mbwaakashingana balaakutandwaamo.

²³ Mwaami Lesa ulatanjilila bantu kuya munshila iyo njebeelete kweendaamo, alimwi ulafuna baabo bamusangalasha.

²⁴ Nakubi kwaamba ayi bawa, balabuka alimwi, mukwiinga Mwaami Lesa ulaakubacafwa ayi babuke.

²⁵ Kuswabo kubwanike kushika abobulya ndindacembela, nshikwe kubonaawo kale baluleme kusuulwa kuMwaami Lesa, nabi bana babo kusengelela cakulya.

²⁶ Sombi balo lyoonse mbeshi kwaababo cakusangalala akukongosha bamwi. Bana babo abalo balaba ncoolwe kuli mbabo.

²⁷ Amuswe kububi mucite shibotu. Munshila iyo lyoonse mulaakunookala cakutalibilika.

²⁸ Mukwiinga Mwaami Lesa ulisuni koombolosha cakutanyengelela, alimwi taalekeleshi bantu bakwe bashomeka. Nkokwaamba ayi lyoonse ulabafuna, sombi bamulunyungu lwa bamucita shibi balaakutandwaamo.

²⁹ Baluleme balaakubwesa cishi ayi ncabo. Balaakunookalaamo kwamuyayaya.

³⁰ Mubandi wa muntu ululeme ngwa busongo alimwi lyoonse taaku ngwaanyengelela.

³¹ Muntu uyo ulalama milawo ya Mwaami Lesa mumoyo wakwe. Aboobo taakoonshi kupambuka kuswa munshila iluleme.

³² Bamucita shibi balaya cibenda baluleme ayi babacaaye.

³³ Sombi Mwaami Lesa taalekeleshi bantu bakwe mumaansaabo, nabi kubalekelesha ayi bapekwe mulandu na baletwa kunkuta.

³⁴ Amube alulangilo muMwaami Lesa akukonkela milawo yakwe. Ulaakumusumpula kwiinda mukumupa cishi. Balo bamucita shibi mulaakubabona kabatandwaamo.

³⁵ Ndakabonaawo mucita shibi shilunkutwe wakalinga kulisumpula, keekala kabotu anga ncishango citookula pabulongo bucite mboleshi.

³⁶ Sombi tapakwe kwiinda aciindi taakwe kucanikaawo. Ndakeelesha kumulangoola apa apaapa cakutamubonaawo.

³⁷ Amuyeeye muntu utacite kampenda, ululeme. Muntu shiluumuno ulaakuba abamulunyungu bakwe.

³⁸ Bamucita shibi boonse ulaakubamana katyenke. Ee, bamulunyungu lwa bamucita shibi balaakulobeshekwa.

³⁹ Mwaami Lesa ngoopulusha baluleme, muli nguwe mobayuba muciindi ca mapensho.

⁴⁰ Mwaami Lesa ulabacafwa akubafuna. Ulabafuna kuswa kubamucita shibi akubapulusha mukwiinga balayuba muli nguwe.