Kulumbaisha 36 - Baibo Busansulushi Bwa Libuku Ili

Muntu mbwaabete mubiibi Alesa mbwaabete kabotu

Kumutanjilili wa bwiimbi. Lwiimbo lwakwe Defedi musebenshi wa Mwaami Lesa.

¹ Bubi buleendelesha bamucita shibi mumyoyo yabo, Ncakwiila mumyoyo yabo taamu kulemeka Lesa napaceyi.

² Mukwiinga balalisumpula akulibeca mumyoyo yabo ayi Lesa taakoonshi kubona shibiibi shabo akubapa mulandu.

³ Myaambo yabo yoonse njabubi alimwi njabubeshi. Kucita shintu shibotu, sha busongo, ncintu ncebakacilekabo kalekale.

⁴ Balo nabi balilete pabulo mulimo wabo nkupanga miyeeyo ibiibi. Taaku cintu cibotu nabi comwi ncebacita, alimwi taaku cintu cibiibi cili coonse ncebakakaawo.

⁵ Mwebo noBaami baLesa lusuno lwanu lutamaani ndunene abuumbi cakushika akwiculu, Ncakwiila akwalo kushomeka kwanu kulashika mwiculu muli nyenyeenshi.

⁶ Kululama kwanu kulabonekesha anga ntulundu tulaamfu. Bululami bwanu buli anga ndweenge lulaamfu abuumbi. NoBaami baLesa, bantu abanyama ndimwe mubalama.

⁷ Lusuno lwanu lutamaani ncakwiila ndwa makwebo abuumbi. Nceceeco bantu boonse ncebasunini kuyuba mucimfule ca mapapaminwa anu.

⁸ Balalya shakulya shibotu muŋanda yanu, akunwa mumulonga wanu wa shoolwe.

⁹ Ee, mwebo muli kantupu kapa buumi, alimwi ceebo ca mumuni wanu tulakonsha kubona mumuni.

¹⁰ Ono amutolelele kutondesha lusuno kubaabo bamwishi, alimwi akucita shintu shibotu kubaabo baluleme.

¹¹ Mutaleeki bantu balisumpula kundwana, nabi kusuminisha bamucita shibi kuntanda.

¹² Amubone bamucita shibi balibo kampa kampa panshi. Mwabawisha alimwi tabakoonshi kubuka napaceyi.