Kulumbaisha 35 - Baibo Busansulushi Bwa Libuku Ili

Mupailo wakusenga lucafwo

Lwiimbo lwakwe Defedi.

¹ NoBaami baLesa amulangane abaabo batoolangana anebo. Amulwane abaabo batoolwana ndime.

² Amupakate liyawo liniini alinene. Amunyamuke ono muncaafwe!

³ Amubambe moondo alisumo, kwaamba ayi mulwane baabo baya bumfwima! Amushomeshe mumoyo wangu ayi, “Ndaakukupulusha.”

⁴ Abasebaane akulenshekwa nsoni abo boonse batoofwima buumi bwangu. Babooleleemo kabaloketwe abo boonse basuni kunyonyoola buumi bwangu.

⁵ Ababebo anga mbuungu butooya amuuwo, munjelo wanu noBaami baLesa atalike kubatandaanya.

⁶ Nshila yabo ibe ya munshinshe alimwi yabuteshi, munjelo wanu noBaami baLesa atalike kubacaya.

⁷ Ceebo bakanteya koose kakutaaku ncendakacita. Bakakaba cilindi cilaamfu ayi nkawiteemo.

⁸ Ono abanyonyooke beene cakuteengashila! Abacatwe beene mukoose nkobateya ndime! Abakakulukileemo beene mucilindi akufwitaamo!

⁹ Lyalo ndaakusangalala ceebo ca Mwaami Lesa, kusangalala mukwiinga mwampulusha.

¹⁰ Ndaakwaamba camoyo woonse ayi, “NoBaami baLesa, anu ngani uli anga ndimwe? Ee, mwebo nomupulusha ulefukite kubaabo mbaatakoonshi kukoma. Ncakwiila mwebo mulapulusha bapenshi kubaabo babalyatilila.”

¹¹ Bakamboni babeshi baleemikana akunshinina, ncakwiila balanshinina pashikani nshenteshi.

¹² Pabubotu mboombacitila balo balambooshesha bubi. Paceebo ceeco ndapeenga, buumba bwansakata.

¹³ Sombi ciindi ndibakaciswa ndakafwala masaka. Ndakalikasha kulya, akupaila mutwi wangu kookontyamikitwe,

¹⁴ kupaila anga ntoopengela mweensuma nabi mukwesu swa nswe. Ndakakontyamika mutwi kubuumba anga ngumuntu utoolila banyina.

¹⁵ Sombi nebo ndindakalisuntula, balo bakatalika kusekelela. Bakabungana akutalika kungweluluka. Bantu mbondatakalinga kwishi bakandwana, bakamfuya cakutaboolaawo pesule nabi paniini.

¹⁶ Bakancelebula camusebaanyo bweenka bucita bakunsengwe. Bakalinga kunoolumanya meeno kubukali pali ndime.

¹⁷ NoBaami baLesa mutootola ciindi cilaamfu buyani kamweebela? Amupulushe buumi bwangu kuswa kubulwani bwabo. Ee, amumpulushe kuswa kunkalamu ishi.

¹⁸ Lyalo ndaakumulumba pakati ka libungano linene lya bantu banu. Ndaakumulumbaisha pakati ka likoto linene pakumulambila.

¹⁹ Mutasuminishi balwani bangu, babeshi, kulisumpwita pali ndime kwiinda mukunkoma. Mutabaleeki bantu aba bampatitebo kutaaku ancindakacita kunangilisha meenso abiibi.

²⁰ Ceebo tabaambi caluumuno, sombi kweenka kupangila shikani bantu abo bekala caluumuno mucishi.

²¹ Balambekesha cakoolobesha ayi, “Ee, ncaakacita twakacibona ameenso esu!”

²² NoBaami baLesa mulishibwene shoonse ishi. Aboobo mutoomunibo anga tamushibwene. Ee, Nkambo, mutalitalamushi kuswa kuli ndime!

²³ Amukalale ono noBaami baLesa, mumfuneeko. Amunyamuke baLesa bangu muŋambilileeko.

²⁴ NoBaami baLesa, baLesa bangu, muliluleme. Amutondeshe kubula mulandu kwangu, alimwi mutaleeki balwani bangu ayi banoosangalalila pali ndime.

²⁵ Mutabaleeki kutalika kwaamba ayi, “Ee, bulya ncetusuni cacitika!” Nabi kwaamba ayi “Twamucita! Wakalinga kwaalya waaluba!”

²⁶ Abo boonse basangalala kubona mapensho angu, abalenshekwe nsoni mukukomwa alimwi abukaluyaluya. Ee, boonse balisumpula ceebo ca ndime abasebaane akulenshekwa nsoni.

²⁷ Sombi abo batoolilila kubona kubula mulandu kwangu abeembe cakusangalala akukondwa, Abaambe lyoonse ayi, “Ulicite nkusu Mwaami Lesa uyo ulengesha musebenshi wakwe kwikala muluumuno.”

²⁸ Lyalo mulomo wangu ulaakwaamba shabululami bwanu. Ndaakunoomulumbaisha bushiku abushiku.