Kulumbaisha 34 - Baibo Busansulushi Bwa Libuku Ili

Lwiimbo lwakwe Defedi ndyaakabeca kucinkuka kuŋanda yakwe Abimeleki. Mpeeke Abimeleki wakamutandaanya, alakwe wakaya.

¹ Nebo ndanoolumbaisha Mwaami Lesa lyoonse. Mulomo wangu teshi ukacilekeewo kumulumbaisha.

² Nebo ndisangalete ceebo ca Mwaami Lesa. Bapengete abanyumfwe bakondwe.

³ Amusumpule nkusu sha Mwaami Lesa pantu pomwi anebo, soonse atulumbaishe liina lya Mwaami Lesa!

⁴ Ndakapaila kuMwaami Lesa, alakwe wakankumbula. Boowa boonse mbondakalinga kucite wakabumana.

⁵ Abo balyatililwa balanga kuli nguwe shiwa nshakusekaseka. Ncakwiila taaku bushiku mbweshi bakalenshekwe nsoni.

⁶ Mupenshi ndyaakasenga, Mwaami Lesa wakamukumbula akumanisha mapensho akwe oonse.

⁷ Ee, munjelo wakwe ulatabilila bantu abo balemeka Mwaami Lesa, alakwe ulabafuna kushintu shiyoosha.

⁸ Amweeleshe, mutoobona ayi Mwaami Lesa ngumubotu. Ulicite coolwe muntu uyuba muli nguwe.

⁹ Amulemeke Mwaami Lesa mwebo nomusalalite mukwiinga abo balemeka Mwaami Lesa taaku ncebabula.

¹⁰ Nkalamu shilawisuka akufwa kunsala, sombi abo banyumfwila Mwaami Lesa, taaku cintu cibotu ncebabula.

¹¹ Amwise nobeensuma nomucikula mukutike, ntoomwiisha kuloonda Mwaami Lesa.

¹² Uyo usuni kwikala buumi bubotu akukondwa munshiku sha buumi bwakwe,

¹³ ulyeelete kucileka kwaamba shibiibi alimwi mulomo wakwe teshi ukaambe shabubeshi.

¹⁴ Ulyeelete kusanduka kuswa kushibiibi, akutalika kucita shiluleme. Ulyeelete kuyandoola akukonkela luumuno.

¹⁵ Mwaami Lesa ulalama baluleme alimwi ulakumbula mipailo yabo,

¹⁶ sombi ulipatite bantu bacita bubi kwaamba ayi kukabule ubeebaluka baakufwa pacishi ca panshi coonse.

¹⁷ Baluleme ndibasenga lucafwo, Mwaami Lesa ulabakumbula akubafuna kuswa mumapensho abo oonse.

¹⁸ Ncakwiila Mwaami Lesa ulibo muliimfwa kubaabo batyongola alimwi ulafuna baabo batacite cakulangila.

¹⁹ Muntu ululeme uleenda mumapensho aanji, sombi Mwaami Lesa ulamufuna mumapensho akwe oonse.

²⁰ Mwaami Lesa ulamulama kabotu. Taaku cifuwa cakwe nabi comwi cityoka.

²¹ Bubi bulaakucaya babucita, aboobo balaakupekwa mulandu abo bapatite baluleme.

²² Ncakwiila Mwaami Lesa ulapulusha basebenshi bakwe. Taaku nabi womwi uyuba muli nguwe weshi akapekwe mulandu.