Kulumbaisha 33 - Baibo Busansulushi Bwa Libuku Ili

Lwiimbo lwa kulumbaisha Mwaami Lesa

¹ Amusangalale muMwaami Lesa noonse nomululeme! Amumulumbaishe mwebo noonse nomumunyumfwila.

² Amulumbaishe Mwaami Lesa mukulisha kalumbu, kwiimba nyimbo akalumbu ka mawaya likumi!

³ Amumwiimbile lwiimbo lupya, kulisha cabuuya pakalumbu ako, alimwi akoolobesha cakusangalala.

⁴ Mukwiinga liswi lya Mwaami Lesa ndya lushinisho, alimwi shoonse nshaacita shilacitwa mukushomeka.

⁵ Mwaami Lesa ulisuni shintu shabululami shitacite kampenda. Lakwe ulabonesha lusuno lwakwe lutamaani pacishi coonse ca panshi.

⁶ Maculu akalengwa kwiinda muliswi lya Mwaami Lesa. Shoonse shili kuli ndilyo shakalengwa kwiindabo mukwaamba kwakwe.

⁷ Maanshi a mulweenge wakaabunjika anga ngalya ali munongo. Mwaami Lesa mwiine ngowakaashinkila kuba mumisena njaabeteemo.

⁸ Paceebo ceeco nsengwe yoonse ailemeke Mwaami Lesa! Ee, nobantu ba mucishi ca panshi noonse amumupe bulemu!

⁹ Ceebo wakaambabo liswi, cishi ca panshi cakabaawo, ncakwiila mukwaambabo kwakwe shintu shoonse shakaboneka.

¹⁰ Mwaami Lesa ulanyonyonganya miyeeyo ya bantu bakunsengwe, ee, ulalengesha bantu abo kubula kucita miyeeyo njebabamba.

¹¹ Sombi miyeeyo ya Mwaami Lesa nja lyoonse alyoonse, Nshaabambite mumoyo wakwe shilacitwa mumashalane oonse.

¹² Ulicite coolwe mushobo ucite Lesa ayi ngoMwaami Lesa wabo. Ncakwiila mushobo wa bantu abo mbwaakasala kutambula shintu nshaakashomesha.

¹³ Mwaami Lesa ulalanga panshi akubona pabantu boonse kali kwiculu.

¹⁴ Boonse bashiite pacishi ca panshi ulababona kuswa pacuuna cakwe ca bwaami.

¹⁵ NguLesa uyo wakabapa tulango twabo, alimwi shoonse nshebacita ulishishi.

¹⁶ Mwaami taapulushikwi ceebo cakufula kwa bashilumamba bakwe. Taaku shilumamba ukoma kwiinda munkusu shakwe shiinji.

¹⁷ Liaki lya nkondo teshi lyakushoma ayi lilapulusha. Nabi lilicite nkusu shiinji, talikoonshi kupulusha.

¹⁸ Sombi meenso a Mwaami Lesa ali pabaabo bamulemeka, abo bacinkite manungo mulusuno lwakwe lutamaani.

¹⁹ Ulabapulusha kuswa kulufu, akutabaleka ayi bafwe kunsala.

²⁰ Kulangila kwesu kuli muMwaami Lesa. Ngootucafwa alimwi ndyeliyawo lyesu.

²¹ Myoyo yesu ilasangalala muli nguwe, mukwiinga ilicinkite manungo muliina lyakwe lisalalite?

²² Lusuno lwanu lutamaani noBaami baLesa alube aswebo, ciindi lulangilo lwesu ndiluli muli ndimwe.