Kulumbaisha 32 - Baibo Busansulushi Bwa Libuku Ili

Kulyaambilila shibiibi akulekelelwa

Lwiimbo lwakwe Defedi lwiitwa ayi Mashikili.

¹ Balicite coolwe abo Lesa mbwaalekelela shibiibi shabo, abo bacite shibiibi nshaakashiminganya!

² Balicite coolwe abo Lesa mbwaateebalukili shibiibi shabo, alimwi ucite moyo mutaamu bubeshi napaceyi.

³ Kaantana kulyaambilila shibiibi shangu, mubili wangu wakalinga kulefukite kukulila bushiku boonse.

⁴ Mukwiinga mashiku amalumwi lyaansa lya bukali bwanu lyakalinga kundemena. Aboobo nkusu shangu shakamaninina bweenka buyuma maanshi kulumwi lwa cilimo.

⁵ Lyalo ndakasumina shibiibi shangu kuli ndimwe, alimwi nshikwe kushisa milandu yangu yoonse. Ndakaamba ayi, “Ntoolyaambilila shibiibi shangu kuli ndimwe noBaami baLesa,” ncakwiila mwakalekelela milandu yakubisha kwangu yoonse.

⁶ Paceebo ceeco bantu banu boonse balyeelete kupaila kuli ndimwe ndimucikumbula. Ncakwiila mapensho aakusefuka anga ngamaanshi mumulonga, teshi akabashikile.

⁷ Muli ndimwe ndushinisho moonjuba. Mulamfuna kumapensho angu oonse. Aboobo ndeemba palupulusho lwanu ceebo mulamfuna.

⁸ Mwaami Lesa ulaamba ayi, ndanookwiisha mbobeelete kweenda, ndanookupandaako maano akukulama.

⁹ Utabuli maano anga ndiaki nabi mbongolo isho shicitabo kuyanda kwa mwinesho na shilyaangitwe ntambo atweela mukanwa. Kwabula boobo shifubwa isho tashinyumfwili.

¹⁰ Bantu babiibi balyeelete kupenga, sombi abo bacinkite manungo muMwaami Lesa balaakunoofunwa ceebo ca lusuno lwakwe lutamaani.

¹¹ Amusangalale mwebo nomululeme, ceebo ca shintu shamucitila Mwaami Lesa. Amwiimbishe cakusangalala mwebo nomucita shiluleme.