Kulumbaisha 31 - Baibo Busansulushi Bwa Libuku Ili

Mupailo wakucinka manungo muli Lesa

Kumutanjilili wa bwiimbi. Lwiimbo lwakwe Defedi.

¹ Nobaami baLesa, muli ndimwe moonjuba. Mutakandeeki ayi nkomwe akulenshekwa nsoni, sombi mukampulushe ceebo ca bululami bwanu.

² Amuteye kutwi kwanu kuli ndime, mwise mumfuune cakufwambaana. Amube mwaandami wangu ngweshi nooyubaako, lilinga lyangu lya mabwe mweshi noopulukila.

³ Ncakwiila mwebo ndimwe ciyubilo cangu alimwi alilinga lyangu. Munyeenshe akuntanjilila kwaamba ayi liina lyanu lilemekwe.

⁴ Amumfuune kutoose uto ntundateyekwa, mukwiinga mwebo ndimwe ciyubilo cangu.

⁵ Nebo ndabika buumi bwangu mumaansaanu, amumfuune noBaami baLesa, baLesa bashomeka.

⁶ Mwebo mulipatite bantu babika myoyo yabo kubalesa bakubeca. Sombi nebo ndincinkite manungo muli ndimwe noBaami baLesa.

⁷ Ndanookondetwe alimwi ndanoosangalete ceebo ca lusuno lwanu lutamaani. Ncakwiila ndimwe mubona mumapensho angu alimwi ndimwe mwishi kupenga kwa moyo wangu.

⁸ Amubone, tamukwe kungabaawo mumaansa a balwani bangu, sombi mwakampa lwaanguluko kwaamba ayi nje kuli koonse nkoosuni.

⁹ Amunyumfwile nkumbu noBaami baLesa, ceebo ndi mumapensho anene abuumbi. Meenso angu ashimba kukulila bunene, alimwi moyo amubili wangu wakopoka abuumbi.

¹⁰ Buumi bwangu butooya cifwiimpa ceebo cakulila, ayalo myaaka yangu itooya ciceya ceebo cakutongela. Mubili wangu toocite ankusu ceebo ca buumba bwangu, ncakwiila amushifuwa shangu moonse mwaboolabo tontolo.

¹¹ Balwani bangu boonse balanshibuluka, abalo beshikamukobonyinaangu balanaama. Beensuma boonse batalika kunoonda, kulilabo kumbona mumukwakwa, nkucica.

¹² Ono ndalubwa cakumaninina anga ndifwite, nabi anga ninongo ipwayookite.

¹³ Ndanyuumfwa balwani baanji kabatepeta. Shiyoosha shilinshingulukite uku akooku. Balwani abo, batoopinga ndime, ee, batoopangana ayi bancaaye.

¹⁴ Nebo ndicinkite manungo muli ndimwe noBaami baLesa. Ncakwiila mwebo muli baLesa bangu.

¹⁵ Nebo lyoonse ndi mumaansaanu. Amumfuune kuswa kubalwani bangu, ee, kuswa kubaabo bampensha.

¹⁶ Amunangilishe nemusebenshi wanu akunyumfwila nkumbu. Amumfuune ceebo ca lusuno lwanu lutamaani.

¹⁷ Nebo lyoonse ndapaila kuli ndimwe, mutakandeeki ayi nkomwe akulenshekwa nsoni. Sombi bamucita shibi balo mubalenshe nsoni. Abaye kushuumbwe cakubulawo liswi nabi lyomwi.

¹⁸ Amucale milomo ya bantu babeshi, bantu balyuuma mucaamba akulisumpula, abo baamba maswi abiibi akulisumpula pabantu basalalite.

¹⁹ Nshiinji shintu shibotu nshemwakabambila bamulemeka, shintu nshemucitila bantu bacicila kuli ndimwe. Shintu isho shilibwenekete kumuntu uli woonse.

²⁰ Bantu abo mulabashisa muliimfwa lyanu, kubashisa kuswa kumiyeeyo ibiibi ya balwani. Mulabashisa mumusena wanu mutaamu cakulibilika ayi bafunwe kumatushi aswa kubalwani babo.

²¹ Aalumbaishikwe Mwaami Lesa! Wakatondesha lusuno lwakwe pali ndime munshila ikankamika. Ndakalubona muciindi mapensho ndyaakantyaanisha anga nindabala yashingulukwa abashilumamba.

²² Ndakaloonda akwaamba ayi, “Ono wantandilabo limwi kuya kulaale anguwe.” Sombi wakanyumfwa kulila kwangu, ndindakasenga lucafwo kuli nguwe.

²³ Anu amusune Mwaami Lesa nobantu bakwe bashomeka. Mwaami Lesa ulafuna bantu bashomeka, sombi balisumpula ulabalambula kweelana abubi bwabo.

²⁴ Amuume myoyo palibwe akubula boowa, noonse nomulangila lucafwo kuswa kuli Lesa.