Kulumbaisha 28 - Baibo Busansulushi Bwa Libuku Ili

Mupailo wakusenga lucafwo

Lwiimbo lwakwe Defedi

¹ NoBaami baLesa, mwaandami wangu, ndimwe ndilila lucafwo, mutaciti anga tamunyumfwite liswi lyangu, ceebo na muumunebo, ntoofwa anga mbamwi boonse.

² Amukutike kupaila kwangu ndyeemulila ayi muncaafwe, ee, ndyeentondeka maansa kuMusena wanu Usalalite Wiindaawo,

³ Mutantoleleli kulufu kuntu komwi abamucita shibi, bantu abo bacita shintu shitaluleme. Bantu abo balaamba cabushicibusa, sombi mumyoyo yabo muli lupato.

⁴ NobaLesa amubalambule kweelana amicito yabo, ncakwiila kweendelana akubica kwa milimo yabo. Amubacitile kweelana abweelete shintu nshebacita, ee, kubabooshesha cilambu ncebeelete kupekwa.

⁵ Bantu abo taaku mbobabona milimo ya Mwaami Lesa. Tababiki maano kushintu Mwaami Lesa nshaakalenga. Paceebo ceeco utoobapa mulandu, akubanyonyweetabo limwi.

⁶ Aalumbaishikwe Mwaami Lesa! Ceebo wanyumfwa ndindasenga lucafwo.

⁷ Mwaami Lesa ngoompa nkusu akumfuna, ndushinisho ndicinkite manungo muli nguwe. Aboobo ulancafwa alimwi ndamulumbaisha cakukondwa, alimwi ndamulumba kwiinda mulwiimbo lwangu.

⁸ Mwaami Lesa ngoopa nkusu bantu bakwe, ngoofuna akupulusha mwaami uyo ngwaakasala.

⁹ Ee, nobaLesa amupulushe bantu banu, amubape coolwe mukwiinga mbanu, Amube beembeshi babo lyoonse akunoobalama lyoonse alyoonse.