Kulumbaisha 27 - Baibo Busansulushi Bwa Libuku Ili

Mupailo wakulumbaisha akusenga lucafwo

Lwiimbo lwakwe Defedi

¹ Mwaami Lesa ngomumuni alimwi ngoompulusha, taaku muntu nabi womwi ngoonoonda. Mwaami Lesa ndyelilinga lya buumi bwangu, taaku muntu nabi womwi ngoonoonda,

² Bantu babiibi ndibamfuumukila ayi banyonyoole, balwani bangu, ee, abo bampatite ndibesa ayi bandwaane, balalisuntula akuwa kwiinda mukukomwa.

³ Ono nabi likoto lya bashilumamba lyoonse lyanshinguluka, moyo wangu tooswiiwo kuboowa napaceyuubo. Ncakwiila nabi nkoondo yambukila nebo ndanoocinkitebo manungo muli Lesa.

⁴ Ndasenga cintu comwi kuMwaami Lesa. Cintu comwi ico nceensenga ncakwaamba ayi nookala muŊanda yakwe kwabuumi bwangu boonse, kwaamba ayi noosangalala pabubotu bwakwe akunoomulambila muŊanda yakwe isalalite.

⁵ Muciindi ca mapensho ulaakunshisa, ulaakundama kabotu muŊanda yakwe isalalite, ee, ulaakumbika pamusena pataaku cakulibilika.

⁶ Aboobo balwani bangu abo banshingulukite ndaakubakoma. Ndaakunoobenga milambu muŊanda yakwe isalalite akwiimba cakusangalala, Ndaakwiimbila Mwaami Lesa inyimbo munshila isangalasha kunyumfwa.

⁷ NoBaami baLesa, kamunkutika ndimwiita, kamunyumfwila nkumbu akukumbula kusenga kwangu.

⁸ Mwebo mwakaamba ayi, “Kamunambila.” Nebo ndakaamba ayi, “Ndanoomulambila noBaami baLesa,

⁹ ono mutanoolishisa kuswa kuli ndime.” Mutantandaanyi nemusebenshi wanu cabukali, mwebo ndimwe muncafwa mumapensho angu. Mutansuuli, ncakwiila mutamfutatili, mwebo nobaLesa bapulushi bangu.

¹⁰ Ee, bata abama inga bakonsha kunsuula, sombi Mwaami Lesa ulaakundama kabotu.

¹¹ Anu noBaami baLesa amunjiishe nshila shanu, amunyenshe munshila isalalite ya bululami, ceebo balwani bangu mbaanji abuumbi.

¹² Mutandekeli mumaansa a balwani bangu, mukwiinga bakamboni babeshi bambukila alimwi banengesha kunyumfwa boowa.

¹³ Ndishinishite kwaamba ayi ndaakubona bubotu bwa Mwaami Lesa mumusena wa boomi.

¹⁴ Anu amucinke manungo muMwaami Lesa, amube alushomo cakutatyongola. Ee, amucinke manungo muMwaami Lesa.