Kulumbaisha 26 - Baibo Busansulushi Bwa Libuku Ili

Mupailo wa muntu uli kabotu

Lwiimbo lwakwe Defedi

¹ NoBaami baLesa, amutondeshe kululama kwangu mukwiinga ndacita shiluleme mubuumi bwangu, alimwi ndicinkite manungo muli ndimwe noBaami baLesa cakutatonsha.

² NoBaami baLesa, amunjeleshe akumbona kabotu, mulangelange kabotu mumoyo wangu amiyeeyo yangu.

³ Ceebo lyoonse nshilubi lusuno lwanu lutamaani, alimwi lyoonse mubuumi bwangu ndeenda cakushomeka kuli ndimwe.

⁴ Nebo nsheendi abantu batabete kabotu sobwe, nabi kweenda abantu baamba nshebataciti.

⁵ Bantu bacita shibiibi nshinyumfwani abo, ncakwiila nsheendi abamucita shibi.

⁶ Ndasamba kumaansa kutondesha ayi taaku cibiibi ncendakacita, ndeendaana kucipaililo canu mukumulambila noBaami baLesa.

⁷ Ndeemba cakoolobesha lwiimbo lwakumulumba, alimwi akushimika pamilimo yanu ikankamika.

⁸ NoBaami baLesa, Ŋanda njemukalaamo ndiisuni, nkokwaamba ayi musena uyo mucanika bulemu bwanu.

⁹ Ono mutanyonyweeti pantu pomwi abamucita shibi, mutalobyi buumi bwangu pantu pomwi abacayi batila bulowa,

¹⁰ bantu bacita shibiibi ciindi coonse alimwi bantu abo batambula makulo.

¹¹ Sombi nebo mubuumi bwangu nshicite kampenda, amunangilishe cakunyumfwila nkumbu akumpulusha.

¹² Ndiimfwi pamusena pataapu cakulisukama, ndalumbaisha Mwaami Lesa pakati ka likoto lya bantu bakwe.