Kulumbaisha 25 - Baibo Busansulushi Bwa Libuku Ili

Kupaililwa kutanjililwa akufunwa

Lwiimbo lwakwe Defedi

¹ Ndimwe nambilabo noBaami baLesa.

² NoBaami baLesa ndimwebo ncinkitemo manungo, mutakanenshi nsoni kubalwani bangu kwiinda mukukomwa. Ncakwiila mutalengeshi balwani bangu kulisumpula pali ndime.

³ Taaku muntu ulangila kucafwikwa kuswa kuli ndimwe weshi akalenshekwe nsoni. Sombi abo bafwambaana kwaalookila Mwaami Lesa ndushinisho balaakulenshekwa nsoni.

⁴ NoBaami baLesa, amuntondeshe nshila shanu, munjiishe mboonjelete kweenda pameenso anu.

⁵ Amunjiishe akuntanjilila mulushinisho lwanu, mukwiinga ndimwe baLesa nomumpulusha. Lyoonse ndalangila lucafwo kuswa kuli ndimwe.

⁶ Ono noBaami baLesa amwiibaluke inkumbu alusuno lwanu lutamaani, isho nshemuntondesha kuswabo kalekale.

⁷ Shibiibi shangu sha kubwanike mutakashiibaluki, nshila shangu sha bwaashu mutakashiibaluki. Munjibaluke mulusuno lwanu nobeene, mukwiinga mwebo NoBaami baLesa muli kabotu.

⁸ Ee, Mwaami Lesa ngoolibo kabotu alimwi ululeme. Paceebo ceeco uleeisha bamucita shibi nshila shakwe.

⁹ Abo balibombya ulabatanjilila munshila shiluleme, alimwi ulabeeisha mbobeelete kweenda.

¹⁰ Nshila sha Mwaami Lesa nsha lusuno alimwi nsha kushomeka. Ncakwiila ulashomeka kubaabo bakonkela cipangano amilasho yakwe.

¹¹ Ono ceebo ca ndimwe noBaami baLesa amulekelele bubi bwangu nabi mbuunji.

¹² Anu ngani muntu ulemeka Mwaami Lesa? Ngooyo utondeshekwa kuswa kuli nguwe nshila njeelete kutola.

¹³ Muntu uyo ulaswitilila mushintu shoonse, abamulunyungu lwakwe balaakupyana cishi.

¹⁴ Mwaami Lesa ulaba shicibusa kubamulemeka, ulabayubulwiita cipangano cakwe.

¹⁵ Lyoonse meenso angu alalangila lucafwo kuswa kuMwaami Lesa, mukwiinga lakwebo eenka ngookonsha kuŋangulula mutoose tuncite.

¹⁶ NoBaami baLesa, amunangilishe akunyumfwila nkumbu, ndaba neenka alimwi ndapeenga abuumbi.

¹⁷ Ndicite mapensho aanji mumoyo wangu, amumfuune kuswa mumapensho aya oonse.

¹⁸ Amubone mapensho angu oonse akuungumana kwangu, lyalo mundekelele shibiibi shangu shoonse.

¹⁹ Amubone balwani bangu mbobafula, alimwi amubone mbobampatite calufu!

²⁰ Amutabilile buumi bwangu akumfuna, mutandeeki ayi ndenshekwe nsoni ceebo ndimwe ciyubilo cangu.

²¹ Kushomeka kwangu abululami bwangu shimfuune, mukwiinga kulangila kwangu kuli muli ndimwe.

²² NobaLesa amupulushe bene Isilaeli, amubapulushe kuswa mumapensho abo oonse.