Kulumbaisha 24 - Baibo Busansulushi Bwa Libuku Ili

Lesa Ngomwaami Shibulemu

Lwiimbo lwakwe Defedi.

¹ Cishi ca panshi ashoonse shiliimo nsha Mwaami Lesa. Nkokwaamba ayi cishi pantu pomwi abantu boonse bekaalaamo mbaakwe.

² Ceebo ngowakacilenga peculu lya lweenge, ncakwiila ngowakacikalika peculu lya maanshi.

³ Anu ngani weelela kutanta kalundu ka Mwaami Lesa? Ngani weelela kwiimikana mumusena wakwe usalalite?

⁴ Ngooyobo ucita shisalalite, utacite cibiibi mumoyo. Ngooyo utalambili shibumbwabumbwa, nabi kubeca pakushomesha cakulumbila.

⁵ Muntu uyo ulaakupekwa coolwe kuswa kuMwaami Lesa. Kululama kwakwe kulaakuswa kuli Lesa, Mupulushi wakwe.

⁶ Bantu ba mushobo uyo mbobasuni kumulambila, ee, mbobaabo basunishi kulambila Lesa wakwe Jakobo.

⁷ Amushiye nshila inene nominjililo ya ndabala, amucaluke noshisasa shikulukulu, kwaamba ayi Mwaami shibulemu enjile.

⁸ Anu Mwaami shibulemu ngani? NguMwaami Lesa Shinkusu shoonse. NguMwaami Lesa uyo ukoma cankusu munkondo.

⁹ Amushiye nshila nominjililo ya ndabala, amucaluke noshisasa shikulukulu, kwaamba ayi Mwaami shibulemu enjile.

¹⁰ Anu Mwaami shibulemu ngani? NguMwaami Lesa Shinkusu shoonse. Lakwe ngoMwaami shibulemu.