Kulumbaisha 22 - Baibo Busansulushi Bwa Libuku Ili

Lwiimbo lwakulila mumapensho alwakulumba

Kumutanjilili wa bwiimbi. Mumukumo wa “Nsefu ya macuunsa.” Lwiimbo lwakwe Defedi.

¹ “NobaLesa bangu, nobaLesa bangu, ino nciinshi ncemwandekeleshesha?” Nceebonshi ncemutoobula kuncafwila? Ceebonshi tamutoonyumfwa kutongela kwangu?

² NobaLesa bangu, ndamulilila malumwi, sombi mwebo tamunkumbuli. Ndamulilila mashiku nshicani kookesha.

³ Nakubi boobo ndimwe nomushiite pacuuna ca bwaami ceebo mulisalalite. Ncakwiila ndimwe mulumbaishikwa kubene Isilaeli.

⁴ Bamashali besu bakulukulu bakalinga kucinkite manungo muli ndimwe. Bakalinga kucinkite manungo muli ndimwe, amwebo mwakalinga kubafuna.

⁵ Bakalinga kumulilila, amwebo mwakalinga kubapulusha. Bakalinga kucinkite manungo muli ndimwe alimwi temwakalinga kubalensha nsoni.

⁶ Ono bulya ndi kabwabo, nshicibete muntu. Ndi shikushibulukwabo akusebaanishikwa kubantu.

⁷ Boonse bambona balancelebula, balancobola akunoopukumunabo mitwi yabo.

⁸ Balaamba ayi, “Sa te ulicinkite manungo muMwaami Lesa, ono Mwaami Lesa aamupulushe tubone. Aamufuune na ncakwiila ulimusuni.”

⁹ NobaLesa, ndimwe mwakanengesha ayi nshalwe kabotu kuswa mulifumo lya bama. Ndimwe mwakandela kabotu kaancili kulukolo.

¹⁰ Kuswabo kukushalwa kwangu ndicinkite manungo muli ndimwe. Ndushinisho mwebo muli baLesa bangu kuswabo mulifumo lya bama.

¹¹ Mutekali palaale anebo ceebo mapensho ali pafwaafwi kumbonekela, alimwi taaku umwi weenga wancafwa, sobwe.

¹² Balwani baanji bambika pakati anga mbacende. Boonse banshinguluka anga mbacende bacite nkusu ba kuBashani.

¹³ Bandakamina anga ninkalamu itoobulumina munyama ayi imulume.

¹⁴ Nkusu shangu shamana, shamanabo anga ngamaanshi apukwitwa panshi. Shifuwa shangu shilibo anga shaswaamo mumanungi. Awalo moyo wangu wababo anga mbukato bwasunguluka.

¹⁵ Mukanwa mwangu mwayuma nta anga ncikula, awalo mulaka wangu wacatilila kwiculu. Mwebo mwandekelesha ayi ndifwiite mulusuko.

¹⁶ Likoto lya bantu babiibi lilinshingulukite, bambika pakati anga ndikoto lya baumpe. Bayasa maansaangu ashimpanta shangu.

¹⁷ Ndakonsha kubelenga mafuwa angu oonse. Balwani bangu ndibambona balanjebela akunseka.

¹⁸ Balabaana shakufwala shangu, akuuma cisolo ceebo ca nsalu shangu.

¹⁹ NoBaami baLesa bangu mutekali kulaale anebo. Amwise muncaafwe cakufwambaana mwebo nomumpa nkusu.

²⁰ Amufuune buumi bwangu kulufu lwa mupeeni, mumpulushe kubalwani abo bali anga mbaumpe.

²¹ Amumfuune mumeeno a nkalamu, mumpulushe kumeeca a nyati.

²² Ndaakulwiita bamakwesu nkusu shanu, ndaakumulumbaisha mulikoto lya bantu banu.

²³ Ndaakwaamba ayi, “Amulumbaishe Mwaami Lesa mwebo nomumulemeka, Amumulemeke mwebo noonse nobamulunyungu bakwe Jakobo. Ee, amumuloonde noonse nobantu bene Isilaeli!

²⁴ Mwaami Lesa taasuuli bakandu, nabi kusuula mapensho abo. Tabafutatiliiwo napaceyi, sombi ulabanyumfwila ndibasenga lucafwo.”

²⁵ Ndaakumulumbaisha kulikoto linene lya bantu banu, ceebo ca shintu nshemwancitila. Ndaakucita shoonse nshendakashomesha cakulumbila, pameenso abaabo boonse bamulemeka.

²⁶ Bakandu balaakulya akukuta. Abo balambila Mwaami Lesa balaakumulumbaisha. Ncakwiila kabeendela buumi lyoonse.

²⁷ Bantu ba mumishobo yoonse balaakwiibaluka akusandukila kuMwaami Lesa. Ndushinisho bamumaanda a mishobo imwi yoonse balaakumulambila,

²⁸ mukwiinga bweene mbwa Mwaami Lesa, ngoolela pakati ka mishobo yoonse.

²⁹ Balisumpula boonse balaakufukama pameenso akwe. Muntu woonse uboola kubulongo, ulaakufukama kunembo lyakwe. Nkokwaamba ayi uyo woonse weenga taalilamini buumi.

³⁰ Bacishalwa balaakunoosebensela Mwaami Lesa. Bantu balaakulwiita baabo bacisa shaMwaami Lesa uyo.

³¹ Balaakushimikila shalupulusho lwakwe kubantu batana kushalwa bulya. Balaakulwiitikwa shintu shoonse nshaakacita.