Kulumbaisha 21 - Baibo Busansulushi Bwa Libuku Ili

Kulumbaisha mwaami Lesa ceebo cakukoma

Kumutanjilili wa bwiimbi. Lwiimbo lwakwe Defedi

¹ NoBaami baLesa, mwaami wesu ulikondetwe pankusu nshemwakamupa. Ulisangalete abuumbi ceebo cakumulengesha kukoma balwani bakwe.

² Mwakamupa ncaakalinga kulila mumoyo wakwe. Ncakwiila tamukwe kukaka kucita ceeco ncaakasenga.

³ Mwakamupa buumi mbwaakalinga kusenga, akumufwalika mushini wa golodi wiine wiine kumutwi wakwe.

⁴ Wakamusenga buumi ncakwiila amwebo mwakamupa. Mwakamupa buumi bwa lyoonse alyoonse.

⁵ Bulemu bwakwe bwafula kwiinda mukumulengesha kukoma. Ndushinisho mwamupa bulemu abwaami.

⁶ Ndushinisho mwamupa shoolwe shitamaani, Ulasangalala abuumbi lyoonse ceebo cakuba amwebo.

⁷ Mwaami wesu ulicinkite manungo muMwaami Lesa Shinkusu shoonse, alimwi kwiinda mulusuno lutamaani lwakwe Lesa Wiindaawo teshi akatyuunkwe munwe.

⁸ Nobaami besu, lyaansa lyanu lilacata balwani banu, tabakoonshi kupusumuka mulyaansa lyanu lyalulyo.

⁹ Bushiku mbweshi mukaboneke mulaakubawaala mumulilo uli anga ngwa mumunyumbi. Mwaami Lesa ulaakubamana katyenke mubukali bwakwe. Ncakwiila mulilo wakwe ulaakumana kubalobya.

¹⁰ Bamulunyungu lwabo mulaakubanyonyoola kuswa pacishi ca panshi, ncakwiila taaku bulowa bwabo bweshi bukacaaleewo pakati ka bantu bamwi boonse.

¹¹ Ndushinisho nabi bapangana kubishisha ndimwe, ee, nabi bapangana miyeeyo ibiibi, teshi bakaswitilile.

¹² Balaakumana kucica kuboowa baakubona ayi mweeleka buta bwanu kuli mbabo.

¹³ Amulumbaishikwe mwebo noBaami baLesa ceebo ca nkusu shanu. Tunanokwiimba akushilumbaisha nkusu shanu.