Kulumbaisha 20 - Baibo Busansulushi Bwa Libuku Ili

Kupailila kukoma

Kumutanjilili wa bwiimbi. Lwiimbo lwakwe Defedi.

¹ Mwaami Lesa aamucaafwe nobaami besu, ciindi ndimuli mumapensho Mwaami Lesa, Lesa wakwe Jakobo aamufuune.

² Aamutumine lucafwo kuswa kuŊanda yakwe isalalite. Ee, lucafwo lwanu luswe kuKalundu ka Siyoni.

³ Mwaami Lesa aaibaluke milambu yanu yoonse akutambula milambu yanu yakutenta.

⁴ Aamupe ceeco ncemulila mumoyo wanu, akulengesha nshemubamba shoonse kuswitilila.

⁵ Tulaakoolobesha cakukondwa bushiku mbweshi mukakome. Muliina lyakwe Lesa wesu tulaakutambika mbembela shesu mwiculu kusekelela kukoma. Mwaami Lesa aakumbule kusenga kwanu koonse.

⁶ Ee, ono ndeshiiba kwaamba ayi Mwaami Lesa ulalengesha mwaami ngwaakasala kukoma. Ncakwiila ulakumbula kusenga kwa mwaami wesu kuswa kwiculu lyakwe lisalalite. Ulakumbula ankusu shakwe shiindaawo shakupulusha.

⁷ Bamwi balicinkite manungo mushikoci sha maaki, abamwi mumaaki abo. Sombi swebo tulicinkite manungo muMwaami Lesa, Lesa wesu.

⁸ Balo balaceeshekwa akukomwa, sombi swebo tulasumpuka akushimpa.

⁹ Nobaami baLesa amucafwe mwaami wesu kwaamba ayi akome balwani bakwe. Amukumbule kusenga kwesu twanoopaila.