Kulumbaisha 19 - Baibo Busansulushi Bwa Libuku Ili

Bulemu bwakwe Lesa mbobuboneka mushintu nshaakalenga

Kumutanjilili wa bwiimbi. Lwiimbo lwakwe Defedi.

¹ Liculu lilatondesha bulemu bwakwe Lesa. Ee, shili mwiculu shilashibisha milimo ya maansaakwe.

² Malumwi alalwiita malumwinyina cikani ici aalo mashiku alabandikila mashikunyina mbweeke ubo.

³ Taaku kwaamba, taaku maswi aswa, nkokwaamba ayi taaku maswi anyumfwika.

⁴ Sombi nkombe sha nshisho shilaya mucishi coonse, ncakwiila shilanyumfwika akweela cishi koonse. Wakayakila lisuba ŋanda mwiculu,

⁵ liswa anga ngushibwiinga utooswa muŋanda yakwe nabi anga ngushishisekano ulibambite kucica.

⁶ Lilaswa kweela liculu komwi, akucilingana kuya mukweela kumwi. Taaku ciyuba cikasaashi ca ndilyo.

Milawo yakwe Lesa

⁷ Milawo ya Mwaami Lesa teecite kampenda, ilalengesha muntu kuba abuumi bupya. Shakaamba Mwaami Lesa shilashomekwa, shilalengesha batacite busongo kubaabo.

⁸ Milasho ya Mwaami Lesa ililuleme, ee, ilalengesha moyo kusangalala. Milawo ya Mwaami Lesa ilisalalite, ilatondesha muntu buumi bubotu.

⁹ Kuloonda Mwaami Lesa nkubotu, kulanoolikobo kushikila muyayaya. Koombolosha kwa Mwaami Lesa kuliluleme, mukwiinga lyoonse teshi kwakunyengelela.

¹⁰ Kulayandika kwiinda golodi, ncakwiila golodi wiine wiine. Kulicite mise kwiinda buuci, ee, kwiinda mulolo uswa kumpuma.

¹¹ Kulancenjesha nemusebenshi wanu. Ndatambula cilambu cinene kwiinda mukukukonkela.

¹² Taaku ukonsha kubona shilubo shakwe shoonse. Anu amundekelele nkambo kushibiibi shitaboneki.

¹³ Amuntalamushe kushibiibi shakashanga, ayi shitanyendeleshi napaceyuubo, sobwe. Munshila iyo ndyeshi nkabe muntu utacite kampenda, ncakwiila muntu utacite mulandu unene wiindaawo.

¹⁴ Maswi aswa mumulomo wangu, amiyeeyo ya mumoyo wangu, shoonse shibe sheesho shimusangalasha noBaami baLesa, nomwaandami wangu alimwi noBeshikumpulusha.