Kulumbaisha 18 - Baibo Busansulushi Bwa Libuku Ili

Lwiimbo lwakwe defedi lwa kukoma

Kumutanjilili wa bwiimbi wakwe Defedi musebenshi wa Mwaami Lesa. Maswi ali mulwiimbo ulu wakeembila Mwaami Lesa ndyaakamupulusha kuswa kubalwani bakwe boonse akuli Saulo.

¹ Ndimusuni noBaami baLesa bangu mwebo nomumpa nkusu.

² Mwaami Lesa ngomwaandami wangu, ndyelilinga lyangu lya mabwe alimwi ngomupulushi wangu. Ee, Lesa wangu, ngomwaandami wangu, shikumfuna. Ulantabilila anga ndiyawo, ngumupulushi wangu umfuna amunkondo.

³ Ndapaila kuMwaami Lesa weelete kulumbaishikwa, alakwe ulampulusha kubalwani bangu.

⁴ Lufu lwakampombela anga nintambo, kunyonyooka kwakanshinguluka anga ngumukuuku.

⁵ Lufu lwakalinga kumbelamina, Ee, cuumbwe cakalingabo muliimfwa.

⁶ Ono mumapensho angu ndakapaila kuMwaami Lesa. Ndakeeta Lesa wangu kwaamba ayi ancaafwe. Mpeeke wakakutika liswi kaali muŋanda yakwe. Wakanyumfwa kulila kwangu kwakusenga lucafwo.

⁷ Lyalo kwakaba citentanshi mucishi ca panshi. Liculu alyalo lyakatenkaanishikwa ceebo Mwaami Lesa wakakalala.

⁸ Mumashono akwe mwakalinga kunoosuntabo bwiishi. Amwalo mukanwa lyakwe kamunyakabo mulilo, mulilo uyo ukali anga ngwa makalangasha.

⁹ Mwaami Lesa wakapensula liculu akwisa panshi. Kuunshi kwa myeendo yakwe kwakalinga makumbi ashiya mbi.

¹⁰ Wakalinga kuya buuluka kaatantite pamukelebu. Cipuupu cakalinga ngomapapaminwa akuulukishaako.

¹¹ Munshinshe wakalinga kumushingulukite, wakalingabo mumakumbi a mfula ashiya mbi.

¹² Mucitubilishi ca bulemu bwakwe mwakalinga kuswa makumbi, imfula ya mabwe, alimwi akubeka kwa mfula.

¹³ Lyalo Mwaami Lesa wakaluluma kuswa kwiculu, liswi lya Shinkusu uyo Wiindaawo lyakanyumfwika.

¹⁴ Wakawaala mifwi yakwe akupalanganya balwani bakwe. Kwiinda mukubeka kwa mfula kunene uko wakabalengesha kucica.

¹⁵ Panshi lya lweenge pakacaalabo patuba, lwiimbi lwa cishi ca panshi lwakafwekulwa NoBaami baLesa ndimwakakalalila balwani banu. Ee, noBaami baLesa mwakababulumina cabukali.

¹⁶ Ono Mwaami Lesa wakatambika lyaansa kuswa kwiculu akuncata. Wakansubula mulweenge lwa mapensho angu.

¹⁷ Wakamfuna kuswa kubalwani bangu beshinkusu, balwani abo mbondatakalinga kukonsha kukoma.

¹⁸ Bakandwana ciindi ndindakalinga mumapensho, sombi Mwaami Lesa, Lesa wangu wakanjimikanina.

¹⁹ Wakancafwa kuswa mumeeno a nkalamu, wakampulusha mukwiinga ndamusangalasha.

²⁰ Mwaami Lesa wanambula ceebo ndacita shiluleme. Wampa coolwe mukwiinga nshicite mulandu.

²¹ Ncakwiila ndakonkela nshila sha Mwaami Lesa. Nshikwe kubisha kwiinda mukufutatila Lesa wangu.

²² Ndalama milawo yoonse ya Mwaami Lesa, alimwi nshikwe kupambukaawo mumilasho yakwe.

²³ Ndeenda kaantacite kampenda pameenso akwe, alimwi ndalitalamusha kushibiibi shoonse.

²⁴ Mwaami Lesa wanambula kweelana akululama kwangu. Ncakwiila kweelana akubula mulandu kwangu pameenso akwe.

²⁵ NoBaami baLesa mulashomeka kubaabo bashomeka kuli ndimwe, alimwi muli babotu kubaabo bali kabotu kuli ndimwe.

²⁶ Mulisalalite kubaabo basalalite kuli ndimwe. Sombi kubaabo bataluleme pameenso anu, muli bakali.

²⁷ Mulapulusha baabo balibombya, sombi mulaboosha panshi abo balisumpula.

²⁸ Mwebo noBaami baLesa ndimwe munyasha mumuni wa buumi bwangu, mulapalanganya munshinshe kunembo lyangu.

²⁹ Mulampa nkusu ayi nkonshe kulwana balwani bangu, alimwi mulanengesha kukonsha kuuluka malinga abo.

³⁰ Nshila ya Mwaami Lesa teecite kampenda. Maswi aMwaami Lesa ncakwiila alashomeka. Mwaami Lesa ulibo anga ndiyawo kubaabo bayuba kuli nguwe.

³¹ Mwaami Lesa eenkabo ngoLesa. Taaku shikufuna umwi kulekabo nguwe.

³² Ono uyu Lesa eenka nceciyubilo cangu ciyumu nta, alimwi ulanengesha kweenda, nshila yangu keetuba.

³³ Ulanengesha kulyata panshi cakushimpa, alimwi ulandama ciindi ndyeemba patulundu.

³⁴ Uleeisha maansaangu kulibambila kulwana. Ee, maansaangu alakonsha koomfola buta bwa bulonse.

³⁵ Nobaami baLesa, mwakampa lupulusho lwanu anga ndiyawo alimwi lucafwo lwanu lwanengesha kuba muntu wa bulemu.

³⁶ Mulancafwa ayi ntacatwi busha munkondo, taaku bushiku mbondakawa panshi pakulwana.

³⁷ Ndakalinga kutandaanya balwani bangu akubakoma. Nshindakalinga kuboolaako kushikila ndamana kubanyonyoola.

³⁸ Ndakalinga kubakoma cakutakonsha kubuka, alimwi ndakabalyatilila panshi cakutapipila.

³⁹ Mwakampa nkusu shakulwana munkondo akunengesha kukoma balwani bangu.

⁴⁰ Ndimwe mwakalengesha balwani kucica kuboowa. Ndakanyonyoola boonse bakalinga kumpatite.

⁴¹ Bakalinga kuyandoola lucafwo, sombi taaku wakabapulusha. Bakapaila kuMwaami Lesa, sombi taakwe kubakumbula.

⁴² Ndakalinga kubapela cakubabo anga ndusuko, ndakalinga kubalyatoola anga ngamatipa a munshila.

⁴³ Mwakamfuna kuswa kubantu baashu, akunengesha kutolelela kulela mishobo. Bantu mbondatakalinga kwishiiwo, boonse bali mumaansaangu bulya.

⁴⁴ Ee, na banyumfwa liswi lyangu balanyumfwila. Baswamashi balamfukamina mukumpa bulemu.

⁴⁵ Ncakwiila boonse balaloonda, balaswa mobayuba kabatutumabo.

⁴⁶ Mwaami Lesa ngumuumi! Aalumbaishikwe mwaandami wangu! Aasumpulwe Lesa, Mupulushi wangu!

⁴⁷ Ngoombosheshako cishole kubalwani bangu, alimwi ngoobika balwani bangu mumaansaangu.

⁴⁸ Kubalwani bangu ngoompulusha. Nobaami baLesa mulanengesha kukoma balwani bangu, ncakwiila mulamfuna kubantu bakali.

⁴⁹ Paceebo ceeco ndaakumulumbaisha pakati ka bamumishobo imwi. Ndaakunokwiimba nyimbo shakulumbaisha liina lyanu nobaLesa.

⁵⁰ Ncakwiila Lesa ulalengesha mwaami wakwe kukoma. Lusuno lwakwe kumwaami uyo ngwaakasala talumaani. Ee, kuli ndime neDefedi abamulunyungu lwangu ndwamuyayaya.