Kulumbaisha 17 - Baibo Busansulushi Bwa Libuku Ili

Kupaila kwa muntu utacite mulandu

Mupailo wakwe Defedi

¹ NoBaami baLesa, amukutike kupaila kwangu kwabululami amukutike kulila kwangu. Amuteye kutwi kwanu kumupailo wangu uyu, mupailo utooswa mumulomo mutaamu bubeshi.

² Kubula mulandu kwangu mutookubika patuba, mukwiinga ndimwe mumbwene ayi ndiluleme.

³ Mulishi moyo wangu mboobete ceebo mulaupensoola mashiku. Nakubi kwaamba ayi mwalangoola apa apapalya taaku cilubo ncemuncanina. Ee, mulomo wangu toobishi mukwaamba napaceyi.

⁴ Nshaambi shibiibi bucita bamwi, sombi ndakonkela milawo yanu mukulitalamusha kunshila shibiibi sha bamusembela kulwana.

⁵ Lyoonse ndeenda munshila shanu, taaku bushiku mbondakapambukaamo.

⁶ NoBaami baLesa mulankutika na ndamwiita, amuteye kutwi kwanu akutambula mupailo wangu.

⁷ Amutondeshe lusuno lukankamanisha. Mwebo mulapulusha bantu alyaansa lyanu lya nkusu, mulapulusha boonse besa kuli ndimwe ayi bayube kuswa kubalwani babo.

⁸ Amundaame kabotu bweenka bulamwa liinso, amunshiise muliimfwa lyanu bweenka nkuku mboifukatisha baana.

⁹ Amumfuune kubamucita shibi abo batoondwana, ee, kubalwani bangu, bacayi, abo banshingulukite.

¹⁰ Balwani abo mbantu batacite nkumbu, milomo yabo ilaamba cakulisumpula.

¹¹ Koonse nkondaya balanshinguluka, balayandoola ciindi cakuncailaawo.

¹² Balibo anga ninkalamu itoolindilila kucata munyama, ee, bweenka mbuli nkalamu iyubite itoomubelamina.

¹³ NoBaami baLesa, amunyamuke ono mubalwaane akubakoma! Amumfuune a mupeeni wanu kubamucita shibi aba.

¹⁴ Amumfuune kubantu babiibi ba mushobo uyu. Amumpulushe alyaansa lyanu noBaami baLesa, mukwiinga balo caabo mbuumibo buno bweenka. Amubapoomwete mapensho ayo ngomwakabasungila. Kubana babo akeendeewo tibili akubamashikulu babo.

¹⁵ Sombi nebo, mubululami ndaakumubona meenso ameenso, ndaakubushikwa ndaakusangalala abuumbi kumubona.