Kulumbaisha 16 - Baibo Busansulushi Bwa Libuku Ili

Mupailo wa lushomo

Mikitamu yakwe Defedi

¹ Amumfuune nobaLesa, muli ndimwe moonjubila.

² Nebo ndakaambila Mwaami Lesa ayi, “Ndimwe Baami baLesa, baLesa bangu. Shibotu shoonse nsheencite shilaswa kuli ndimwe.”

³ Bantu bakwe Lesa bali pacishi ca panshi, ncakwiila balalemekwa, alimwi ndasangalala pali mbabo.

⁴ Ono abo baya bulambila balesa bamwi, balalifushishabo mapensho beene. Nebo nshikoonshi kubengaabo mulambu wa bulowa, alimwi nshikoonshi kulambila balesa babo.

⁵ NoBaami baLesa ndimwe mwakampa cipansha cangu ca cishi, ncakwiila ndimwe mwakampa ankomeshi ya shoolwe shangu shoonse. Nshiku shangu shitoosa shili mumaansaanu.

⁶ Manyinsa a cishi cangu mwakaatandabwita mumisena ibotu. Cipansha ca cishi cangu cilansangalasha abuumbi

⁷ Ndanoolumbaisha Mwaami Lesa ceebo ulamfunda, awalo moyo wangu ulanjibalusha mashiku.

⁸ Lyoonse ndatanjisha Mwaami Lesa wangu. Aboobo teshi nkapenge ceebo uli pafwaafwi anebo.

⁹ Paceebo ceeci moyo wangu wakondwa abuumbi, alimwi ndisangalete abuumbi bulya ndintokwaamba. Awalo mubili wangu wa buntu ulaakookesha muluumuno,

¹⁰ Mukwiinga teshi mukandekeleshe ayi nkanoolibo mumusena wa bafu, nabi kulekelesha Usalalite wanu ayi abole.

¹¹ Mwebo mwakanshibisha nshila shitola kubuumi, alimwi ceebo mwebo muli anebo, ndasangalala abuumbi, ncakwiila kusangalala kutamaani muliimfwa lyanu.