Kulumbaisha 148 - Baibo Busansulushi Bwa Libuku Ili

Kulumbaisha Lesa kwa shilengwa shoonse

¹ Amulumbaishe Mwaami Lesa! Amulumbaishe Mwaami Lesa mwebo nomwikala kwiculu. Amumulumbaishe nomwikala kwiculu kwiine.

² Amumulumbaishe noonse nobaanjelo bakwe. Amumulumbaishe nomakoto a bashilumamba bakwe boonse.

³ Amumulumbaishe nolisuba amweenshi. Amumulumbaishe noonse nonyenyeenshi shibala.

⁴ Amumulumbaishe noliculu lya maculu, amwebo nomaanshi ali kwiculu.

⁵ Shoonse ashilumbaishe liina lya Mwaami Lesa ceebo shakalengwa kwiinda muliswi lyakwe.

⁶ Wakashibika mumisena ya nshisho tibili muyayaya. Wakashibikila mulawo uyo weshi ukabule kumana.

⁷ Amulumbaishe Mwaami Lesa nobapacishi ca panshi, banyama bamumaanshi anolweenge lulaamfu.

⁸ Amumulumbaishe mwebo nokubeka kwa mfula, nomfula ya mabwe, nocaandwa, nomakumbi alimwi anomyuuwo iyoosha inyumfwila milawo yakwe.

⁹ Amumulumbaishe mwebo notulundu tuniini atunene, noshisamu sha shisepo anomisaansa ya masida.

¹⁰ Amumulumbaishe mwebo nobanyama bamuluundu anoshifubwa, nontale ashimwi sha mushobo uyo alimwi abayuni bauluka.

¹¹ Amumulumbaishe nobamaami ba mucishi amishobo yoonse, nobanaabaami abeendeleshi bamwi boonse.

¹² Amumulumbaishe mwebo nobacikula bwangu basankwa abamyooye, nobamanene abaana baniini.

¹³ Shoonse isho ashilumbaishe liina lya Mwaami Lesa ceebo liina lyakwe ndyeliinda pameena oonse. Bulemu bwakwe buleenda bwa shintu sha mucishi ca panshi asha kwiculu.

¹⁴ Wakasumpula bantu bakwe mukubapa nkusu ayi bantu bakwe boonse basalalite, ee, bene Isilaeli abo mbwaasuni bamulumbaishe. Amulumbaishe Mwaami Lesa!