Kulumbaisha 147 - Baibo Busansulushi Bwa Libuku Ili

Kulumbaisha Lesa Shinkusu Shoonse

¹ Amulumbaishe Mwaami Lesa! Ncibotu abuumbi kwiimba nyimbo shakulumbaisha Lesa wesu. Ndushinisho cilasangalasha alimwi cileelela kumulumbaisha.

² Mwaami Lesa utooboosha Jelusalemu mbwaakalinga. Utooyobolola bene Isilaeli bakalinga mushishi shabusha.

³ Ngooyumyayumya myoyo ityongookite akwaanga shilonda shabo.

⁴ Ulishi mweelo wa nyenyeenshi, alimwi shoonse ulashiita meena a nshinsho.

⁵ Mwaami wesu ngumunene alimwi ulicite nkusu shiinji. Busongo bwakwe tabucite meelelesho.

⁶ Mwaami Lesa ngoosumpula baliceesha, sombi ulalyatoola bamucita shibi.

⁷ Amwiimbile Mwaami Lesa nyiimbo shakumulumbaisha, amwiimbile Lesa wesu akalumbu.

⁸ Lakwe ngoofwekelesha liculu amakumbi, ngoolosha mfula pacishi ca panshi, akumenesha bwiisu patulundu.

⁹ Ngoopa shakulya kushifubwa atwana twa bacikwangala na twalila.

¹⁰ Lakwe taasangalalili munkusu sha liaki. Taasangalalili mubashilumamba beshinkusu.

¹¹ Sombi ulasangalalila muli babo bamulemeka, abo bacinka manungo mulusuno lwakwe lutamaani.

¹² Lumbaisha Mwaami Lesa oJelusalemu! Lumbaisha Lesa wako oSiyoni!

¹³ Lakwe ngooyumya mpingilo sha kuminjililo yako, akupa coolwe bantu bekala mumo.

¹⁴ Ulalama manyinsa ako akukupa witi uunji wiindaawo kubota.

¹⁵ Na wapa mulawo wakwe pacishi, maswi akwe alafwambaana kunyumfwika.

¹⁶ Ulalosha caandwa anga mbooya bwa mbelele. Ulapalanganya maanshi aangite anga njimilota.

¹⁷ Mwaami Lesa ngoolosha mfula ya mabwe. Anu ngani weenga waliyuminisha kumpewo njaatuma?

¹⁸ Na wambakobo aalo mabwe ayo a mfula nkusunguluka. Na watumako muuwo maanshi nkukunka.

¹⁹ Wakayubulwita Jakobo maswi akwe. Wakayubulula milawo amilasho yakwe kubene Isilaeli.

²⁰ Taaku mushobo umwi ngwaakacitila boobo, ceebo bamumishobo imwi tabeshi milawo yakwe. Amulumbaishe Mwaami Lesa!