Kulumbaisha 146 - Baibo Busansulushi Bwa Libuku Ili

Kulumbaisha mwaami Lesa mupulushi

¹ Aalumbaishikwe Mwaami Lesa! Omoyo wangu lumbaisha Mwaami Lesa!

² Ndaakulumbaisha Mwaami Lesa kwabuumi bwangu boonse. Ndaakwiimba nyimbo shakulumbaisha kuli Lesa wangu ndyeencili muumi.

³ Mutaciinki manungo mubamaami, mbantubo tabakoonshi kumufuna.

⁴ Bushiku ndibafwa, balaboolela kubulongo. Pabushiku ubo nshibabambite shoonse shileela.

⁵ Ulicite coolwe muntu ucafwikwa kuMwaami Lesa wakwe Jakobo, ncakwiila muntu ucinkite manungo muMwaami Lesa, Lesa wakwe.

⁶ Ee, muntu uyo ushoma muli wooyo wakalenga liculu acishi ca panshi. Lesa uyo wakalenga lweenge ashoonse shili mushintu isho. Mwaami Lesa uyo ulashomeka kwalyoonse alyoonse.

⁷ Ncakwiila ngooimikanina baabo balyatililwa, alimwi ngowooyo upa shakulya kubeshinsala. Mwaami Lesa ulaangulula bantu bali muntolongo ya bubi.

⁸ Ulalengesha boofu mumushimu kubonesha, uloolola bantu basendeme mumushimu, alimwi nguMwaami Lesa usuni baluleme.

⁹ Mwaami Lesa ulalama baswamashi bekala pakati lyesu. Uleemikanina bamukalubinje abana banshiwa. Sombi ulapilinganya buumi bwa bamucita shibi.

¹⁰ Mwaami Lesa ngumwaami walyoonse alyoonse. Ee, Lesa wako oSiyoni ngoolela mumashalane oonse. Amulumbaishe Mwaami Lesa!