Kulumbaisha 145 - Baibo Busansulushi Bwa Libuku Ili

Lwiimbo lwakulumbaisha

Lwiimbo lwakulumbaisha lwakwe Defedi.

¹ Ndaakumulumbaisha nobaLesa, noBaami bangu, akulemeka liina lyanu lyoonse alyoonse.

² Ndanoolumbaisha ndimwe bushiku abushiku. Ndanoolumbaisha liina lyanu lyoonse alyoonse.

³ Mwaami Lesa ulicindeme abuumbi, aboobo ulyeelete kulemekwa camaansa obilo. Ndushinisho taaku ukonsha kwishiba bulemu bwakwe nkobweela.

⁴ Lishalane lilaakunoolwiita lishalane limwi shamilimo yanu iyoosha, ncakwiila alaakunokwaamba pamicito yanu yankusu.

⁵ Balaakunokwaamba pabulemu bwanu apabwaami bwanu, nebo ndaakunooyeeyabo shamilimo yanu ikankamika.

⁶ Bantu balaakunokwaamba pamilimo yanu yankusu iyoosha. Nebo ndaakunokwaambilisha shamicito yanu inene.

⁷ Balaakulumbaisha bubotu bwanu buunji, balaakwiimba cakusangalala kulumbaisha bululami bwanu.

⁸ Mwaami Lesa ngushiluse alimwi ngushinkumbu. Taafwambaani kukalala alimwi ulicite lusuno lutamaani.

⁹ Mwaami Lesa ngumubotu kuli boonse, ulanyumfwila nkumbu shilengwa shakwe shoonse.

¹⁰ NoBaami baLesa, shilengwa shanu shoonse shilaakumulumbaisha. Ndushinisho bantu banu boonse basalalite balaakumulumbaisha.

¹¹ Balaakwaamba pabulemu bwa bweene bwanu, akulwiita bamwi pankusu shanu.

¹² Balaakucita boobo ayi bantu boonse bakeshibe shamicito yanu yankusu ashabulemu bwa bweene bwanu bukankamika.

¹³ Bweene bwanu mbwamuyayaya, bwaami bwanu mbwa mashalane oonse. Mwaami Lesa ulacita shoonse kweelana ambwaakashomesha, ncakwiila shintu shoonse nshaakalenga ulishisuni.

¹⁴ Mwaami Lesa ngoobusha boonse abo bawa, ngoocatilila boonse abo balefuka.

¹⁵ Shilengwa shoonse shiyoya shilalanga kuli ndimwe, alimwi mulashipa shakulya sha nshisho paciindi ceelete.

¹⁶ Mulafumbatula lyaansa lyanu, akusanina kabotu shoonse nshemwakalenga.

¹⁷ Mwaami Lesa uliluleme munshila shakwe shoonse, ulicite nkumbu pashintu shoonse nshaakalenga.

¹⁸ Mwaami Lesa uli pafwaafwi kubaabo bamwiita, ndushinisho uli pafwaafwi kubaabo bamwiita calushinisho.

¹⁹ Abo bamulemeka ulabapa shoonse nshebasuni. Ulanyumfwa kulila kwabo akubafuna.

²⁰ Mwaami Lesa ulatabilila boonse abo bamusuni, sombi bamucita shibi boonse ulaakubanyonyoola.

²¹ Mulomo wangu ulaakulumbaisha Mwaami Lesa. Shilengwa shakwe shoonse ashilumbaishe liina lyakwe lisalalite kwalyoonse alyoonse.