Kulumbaisha 144 - Baibo Busansulushi Bwa Libuku Ili

Mwaami mbwaakalumba Lesa ceebo cakukoma

Lwiimbo lwakwe Defedi.

¹ Aalumbaishikwe Mwaami Lesa Mwaandami wangu, uyo wiisha maansaangu kulibambila kulwana, aminwe yangu kulibambila nkondo.

² NguLesa wangu shilusuno alimwi moonjuba, lilinga lyangu alimwi ngomupulushi wangu. Ncakwiila ndiyawo lyangu ilyo lintabilila. Ngookoma mishobo imwi akwiibika mumaansaangu.

³ Nobaami baLesa, anu muntu nciinshi ngweenga kamuyeeya? Muntubo nciinshi cakwaamba ayi kamumulama?

⁴ Muntu ulibo anga nkuyoya kwa linkanda lyomwi. Nshiiku shakwe shilibo anga ncimfule ciindilite.

⁵ NoBaami baLesa, amupansaanye liculu akuseluka. Amucate patulundu kwaamba ayi tusunte.

⁶ Amutume kubeka kwanu kwa mfula mupalanganye balwani bangu, amuwaale mifwi yanu akubalengesha kucica.

⁷ Amutambike lyaansa lyanu kuswa kwiculu akuncata. Amunsubule mulweenge lwa mapensho angu ayi mpuluke. Amumfuune kuswa munkusu sha baswamashi,

⁸ bantu abo baamba shakubeca akushomesha cakutashinisha.

⁹ NobaLesa ndaakumwiimbila lwiimbo lupya, ndaakumulishisha kalumbu ka mawaya likumi.

¹⁰ Ndaakwiimbila ndimwe nomupa nkusu shakukoma kubamaami, ee, mwebo nomupulusha neDefedi musebenshi wanu kuswa kumupeeni walufu.

¹¹ Amumfuune kuswa munkusu sha baswamashi ayi mpuluke, bantu abo baamba shakubeca akushomesha cakutashinisha.

¹² Bana besu basankwa bacikula bwangu, bakule kabotu anga shishango shabikwa mboleshi. Bana besu banakashi babe anga ngamacinko ayo abotesha kuŋanda ya bwaami.

¹³ Matala esu aasule shishango sha mishobo amishobo, ashalo mbelele shesu ashishalane cakutabelengeka mumafulo esu.

¹⁴ Ŋombe shesu ashishalane, kutabi shisansula nabi shifwa. Kulila kwa mapensho akumane mumikwakwa yesu.

¹⁵ Balicite coolwe bantu bacitikilwa shintu ishi, ee, balicite coolwe bantu baamba ayi Mwaami Lesa ngoLesa wabo.