Kulumbaisha 143 - Baibo Busansulushi Bwa Libuku Ili

Mupailo wakusenga lucafwo

Lwiimbo lwakwe Defedi.

¹ NoBaami baLesa, amunyumfwe mupailo wangu, amunyumfwe mboontoomulilila akunyumfwila nkumbu. Amumfuune kwiinda mukushomeka kwanu abululami bwanu.

² Mutaŋomboloshi nemusebenshi wanu ceebo taaku muntu muumi ululeme pameenso anu.

³ Balwani bangu balantandaanya, alimwi bandyatoola mukunkoma. Bankalika mumunshinshe. Ndaba anga ngumuntu wakafwabo kalekale.

⁴ Aboobo moyo wangu watyongola, ncakwiila moyo wangu woongumana.

⁵ Na ndeebaluka nshiku shangu shikulukulu, ndayeeya milimo yoonse njemwakacita. Ee, ndeebaluka shoonse nshemwakacita amaansaanu.

⁶ Ndatambika maansaangu kuli ndimwe mukupaila. Moyo wangu ulinyumfwite nyotwa bweenka mbuli bulongo buyumu mbobulila maanshi.

⁷ NoBaami baLesa, amunkumbule cakufwambaana ceebo moyo wangu utoolela. Mutamfutatili, sobwe! Ceebo inga ndaba anga mbaabo batooya kumusena wa bafu.

⁸ Amuntondeshe lusuno lwanu lutamaani kulila bwaca ceebo ndicinkite manungo muli ndimwe. Muntondeshe nshila njeenjelele kutola mukwiinga ndapaila kuli ndimwe.

⁹ NoBaami baLesa amumfuune kubalwani bangu, ceebo muli ndimwe moonjuba.

¹⁰ Amunjiishe kucita kweelana akuyanda kwanu, ceebo ndimwe baLesa bangu. Mushimu wanu ubotu auntanjilile munshila shitacite shakulisukama.

¹¹ NoBaami baLesa, amulame buumi bwangu ceebo ca liina lyanu. Munkushe mumapensho ceebo cabululami bwanu.

¹² Amucaye balwani bangu ceebo ca lusuno lwanu lutamaani. Ee, munyonyoole bampatite boonse ceebo ndi musebenshi wanu.