Kulumbaisha 142 - Baibo Busansulushi Bwa Libuku Ili

Mupailo wakusenga lucafwo

Lwiimbo lwakwe Defedi lwiitwa ayi Mashikili ndyaakalinga mucimfwengo. Mupailo.

¹ Ndalilila Mwaami Lesa muliswi lya peculu. Ndoolobesha kuMwaami Lesa ayi amfwite nkumbu.

² Nanootola matongooshi angu kuli nguwe, ncakwiila lakwe ngoondwiita mapensho angu.

³ Na moyo wangu watyongola, ndimwe mwishi nceenjelete kucita. Munshila moonyinda balwani bangu banteya koose.

⁴ Amulange kulyaansa lyangu lyalulyo, mutoobona ayi taakuuwo nabi womwi umbikaako maano. Ndushinisho taaku nkweenga ndaya mukuyuba. Taaku utoolama buumi bwangu.

⁵ NoBaami baLesa, ndamulilila ayi muncaafwe. Ndaamba ayi, “Ndimwe ciyubilo cangu, ndimwe buboni bwangu boonse mubuumi bwangu buno.”

⁶ Amunyumfwe kulila kwangu, ceebo ndipengete abuumbi. Amumfuune kuli baabo batoompensha, mumfuune ceebo banyinda nkusu.

⁷ Amunkushe muntolongo ya mapensho kwaamba ayi numbaishe liina lyanu. Balulami balaakunshinguluka, ceebo mwancitila shibotu.