Kulumbaisha 141 - Baibo Busansulushi Bwa Libuku Ili

Mupailo wa macolesha

Lwiimbo lwakwe Defedi.

¹ NoBaami baLesa ntoomulilila, amufwambaane kuncafwa. Amunyumfwe liswi lyangu ndyentoomulila.

² Mupailo wangu ube anga ntununkila kabotu pakutenta kunembo lyanu. Kutambika maansaangu kube anga ngumulambu wa macolesha.

³ NoBaami baLesa, amubike shikulindilila pamulyango wa mulomo wangu. Ncakwiila mutansuminishi kwaamba maswi abiibi.

⁴ Mutalekeli moyo wangu kusuna shibiibi. Mutandekeleshi ayi ncite shibiibi pantu pomwi abamucita shibi. Ee, kutandekelesha ayi ndye shilyo shabo shapakusekelela kwabo.

⁵ Muntu ululeme na wanguma, ninkumbu. Na wankalalila cilaba anga ngamafuta atilwa pamutwi wangu. Mutwi wangu teshi ukaakakeewo. Sombi mumipailo yangu ndapikisha micito ya bamucita shibi.

⁶ Bamaleli babo baakuwaalwa kuswa patulundu twa mabwe, balaakusumina ayi ndakalinga kwaamba shalushinisho.

⁷ Lyalo balaakwaamba ayi, “Bweenka mbuli tupapaansha mbotupalangana pakupasoola nkuni, mbweeke ubo mafuwa esu mbweshi akapalangane mucuumbwe.”

⁸ Sombi meenso angu alilangitebo kuli ndimwe Nobaami baLesa noBeshinkusu shoonse, muli ndimwe moonjubite, mutandekeleshi kwaamba ayi mfwe.

⁹ Amuntabilile kutoose ntobanteyete, ee, kuswa kutukuka twa bamucita shibi.

¹⁰ Bamucita shibi abacatwe kutoose twabo, ee, bacatwe sombi nebo nyindemobo kabotu.