Kulumbaisha 140 - Baibo Busansulushi Bwa Libuku Ili

Mupailo wakusenga kutabililwa

¹ NoBaami baLesa amumfuune kubantu babiibi. Amuntabilile kubantu bakali.

² Bantu abo mbeshikupangabo miyeeyo ibiibi mumyoyo yabo, akubusha nkondo nshiku shoonse.

³ Milaka yabo njibiibi mbuli buyoka bwa nsoka. Milomo yabo ilicite buyoka mbuli bwa fumbe.

⁴ NoBaami baLesa amumfuune mumaansa a bamucita shibi, amuntabilile kubantu bakali abo batooyeeya kungwisha.

⁵ Balinteyete koose bantu balisumpula. Bafungulula ntambo sha toombe twabo akuteya toose twabo mweela nshila yangu.

⁶ Nobaami baLesa, ndaamba ayi, “Ndimwe baLesa bangu.” NoBaami baLesa, amunyumfwe mboontoomulilila ayi muncaafwe.

⁷ NoBaami baLesa noBeshinkusu shoonse, Bapulushi bangu, ndimwe mumfuna pabushiku bwa nkondo.

⁸ NoBaami baLesa, mutabasuminishi bamucita shibi kucita nshebasuni mutasuminishi bantu abo miyeeyo yabo kuswitilila.

⁹ Balwani bangu abo banshingulukite balalisumpula. Amulengeshe kwaamba ayi mashingo abo ababoolele.

¹⁰ Makalangasha a mulilo aabalokele, ee, abawaalwe mumulilo, abakasowelwe mushilindi mobatakoonshi kuswa.

¹¹ Abo babekesha bamwi mutabaleeki ayi banoocikala mucishi. Bubi abukanyonyoole bantu bakali.

¹² NoBaami baLesa, ndishi kwaamba ayi mulafuninina bakandu, akwiimikanina bataaku mbobabete ayi batanyengelelwi.

¹³ Baluleme balaakulumbaisha liina lyanu, ee, bantu baluleme balakwiikala kunembo lyanu.