Kulumbaisha 139 - Baibo Busansulushi Bwa Libuku Ili

Lushibo akulama kwa mwaami Lesa

Kumutanjilili wa bwiimbi. Lwiimbo lwakwe Defedi.

¹ NoBaami baLesa mwakanangananga aboobo mulinshi.

² Mulanshiba ndyeenkala nabi ndyeembuka, muleshiba miyeeyo yangu kamuli kooko kulaale.

³ Mulambona mbuli mbooŋenda amboongona, nshila shangu shoonse mwebo mulishishi.

⁴ Kaantana kukusha aliswi pamulomo wangu, noBaami baLesa mwebo inga kamulishi kale.

⁵ Ndimwe muntabilila kunembo akwisule, alimwi ndimwe mumfuna alyaansa lyanu lyankusu.

⁶ Lushibo lwanu pali ndime lwanyinda ciimo. Ncakwiila nshikoonshi kunyumfwisha lushibo lwa mushobo uyo.

⁷ Anu inga ndaya kuli kwaamba ayi njube Mushimu wanu? Anu inga ndacicila kuli kwaamba ayi nswe pameenso anu?

⁸ Nabi ndaamba ayi ntante kwiculu mwebo nkomuli, nabi ndaamba ayi nje mumusena wa bafu mwebo nkomuli.

⁹ Nabi ndoolukila kuswita lisuba, nabi kumbo kwitala lya lweenge, koonse mwebo nkomuli.

¹⁰ Koonsebo uko inga kamuliiko ayi muntanjilile. Ee, lyaansa lyanu lyalulyo inga kalincafwa,

¹¹ Nabi ŋambe ayi, “Ntooyuba munshinshe, lyalo mumuni unshingulukite waba munshinshe,”

¹² awalo munshinshe kuli ndimwe tooshiyiiwo, sobwe. Mashiku aalo alatubabo anga ngamalumwi kuli ndimwe, ceebo munshinshe amumuni tashipuseneewo kuli ndimwe.

¹³ Ndimwe mwakalenga shipansha sha mubili wangu shoonse, ndushinisho ndimwe mwakanunganya mumala muli bama.

¹⁴ Ndamulumbaisha ceebo mwakanenga munshila ikankamika. Ncakwiila milimo yanu yoonse ilakankamika. Cikani ici ndicilabilite amoyo wangu woonse.

¹⁵ Shifuwa shangu ndishakalinga kupangwa, ee, kaancinunganishikwa mumala muli bama, kaancikula mumusena uyo wabushishi, mwebo mwakalinga kwishi kale ayi moondi.

¹⁶ Mwakambona kaantana kushalwa. Nshiku sha buumi bwangu mwakalinga kushilembete kale mulibuku lyanu kashitana akutalika nshiiku isho.

¹⁷ Miyeeyo yanu nobaLesa ilangalila kwiinyumfwa, ndushinisho miyeeyo yanu pali ndime italifulili.

¹⁸ Na ndaamba ayi njibelenge inga yeenda museese kufula. Ono ndyeembuka ndacana ayi ncili amwebo.

¹⁹ NoBaami baLesa inga cabota na bamucita shibi mwabanyonyoola. Ee, amuntalamuke mwebo nobeshikutila bulowa!

²⁰ Balamba shintu shibiibi pali ndimwe. Ee, balaamba shibiibi kubisha liina lyanu.

²¹ NoBaami baLesa, ndibapatite abo bamupatite alimwi bantu bamubukila balamfundoosha kumoyo.

²² Ncakwiila ndibapatite apanshi mbi. Ndabalangabo ayi mbalwani bangu.

²³ NobaLesa, amunangenange kwaamba ayi mwishibe moyo wangu. Amunsuunke kwaamba ayi mwishibe miyeeyo yangu.

²⁴ Amubone na ndakonkela nshila shibiibi. Lyalo muntanjilile munshila yanu yamuyayaya.