Kulumbaisha 138 - Baibo Busansulushi Bwa Libuku Ili

Mupailo wakulumbaisha

Lwiimbo lwakwe Defedi.

¹ Nobaami baLesa, ndaakumulumbaisha amoyo wangu woonse. Ndaakwiimba nyimbo shakumulumbaisha pameenso a balesa bamwi.

² Ndaakufukama kunembo lya Ŋanda yanu isalalite. Ndaakulumbaisha liina lyanu ceebo ca lusuno lwanu lutamaani akushomeka kwanu. Ee, mukwiinga mwasumpula liina lyanu amaswi anu kwiinda shintu shimwi shoonse.

³ Ciindi ndindakamulilila, mwebo mwakankumbula. Mwakanjumya moyo akunkalika caamba.

⁴ NoBaami baLesa, boonse bamaami ba pacishi ca panshi balaakumulumbaisha. Ncakwiila balaakumulumbaisha baakunyumfwa maswi anu.

⁵ Balaakwiimba shanshila shanu noBaami baLesa ceebo bulemu bwanu mbunene abuumbi.

⁶ NoBaami baLesa, nakubi kwaamba ayi muli kwiculu mulalama baliceesha alimwi beshikulisumpula mulabona shintu shoonse nshebacita.

⁷ Nabi ŋende pakati ka mapensho, mwebo mulalama buumi bwangu. Mulatandabika lyaansa lyanu kukasha bukali bwa balwani bangu. Ndushinisho mwebo mulamfuna alyaansa lyanu lyalulyo.

⁸ NoBaami baLesa mulaakuncitila shoonse nshemwakanshomesha. Lusuno lwanu noBaami baLesa ndwamuyayaya. Mutalekeleshi milimo ya maansaanu.