Kulumbaisha 136 - Baibo Busansulushi Bwa Libuku Ili

Lwiimbo lwakulumba

¹ Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.

² Amulumbe Lesa wa balesa boonse, ee, mukwiinga lusuno lwakwe ndwamuyayaya.

³ Amulumbe Mwaami wa baami ee, mukwiinga lusuno lwakwe ndwamuyayaya.

⁴ Mwaami Lesa eenkabo ngookonsha kucita shaankamiko, ee, mukwiinga lusuno lwakwe ndwamuyayaya.

⁵ Wakalenga liculu mubusongo bwakwe, ee, mukwiinga lusuno lwakwe ndwamuyayaya.

⁶ Wakayaka cishi peculu lya maanshi, ee, mukwiinga lusuno lwakwe ndwamuyayaya.

⁷ Ngowakalenga mimuni inene ya mwiculu, ee, mukwiinga lusuno lwakwe ndwamuyayaya.

⁸ Wakalenga lisuba ayi linokweendelesha malumwi, ee, mukwiinga lusuno lwakwe ndwamuyayaya.

⁹ Mweenshi anyenyeenshi ayi shinokweendelesha mashiku, ee, mukwiinga lusuno lwakwe ndwamuyayaya.

¹⁰ Wakacaya baana bakwiiya ba bene Ijipiti, ee, mukwiinga lusuno lwakwe ndwamuyayaya.

¹¹ Lesa wakakusha bene Isilaeli pakati kabo, ee, mukwiinga lusuno lwakwe ndwamuyayaya.

¹² Wakabakusha alyaansa lya nkusu alimwi litandabikitwe, ee, mukwiinga lusuno lwakwe ndwamuyayaya.

¹³ Wakapansaanya Lweenge Lusalala pakati, ee, mukwiinga lusuno lwakwe ndwamuyayaya.

¹⁴ Wakasubusha bene Isilaeli pakati ka ndulo, ee, mukwiinga lusuno lwakwe ndwamuyayaya.

¹⁵ Lesa wakalobya Falawo abashilumamba bakwe muLweenge Lusalala, ee, mukwiinga lusuno lwakwe ndwamuyayaya.

¹⁶ Wakatanjilila bantu bakwe muluyanga, ee, mukwiinga lusuno lwakwe ndwamuyayaya.

¹⁷ Wakanyonyoola bamaami beshinkusu, ee, mukwiinga lusuno lwakwe ndwamuyayaya.

¹⁸ Ncakwiila wakacaya bamaami bacite mpuwo, ee, mukwiinga lusuno lwakwe ndwamuyayaya.

¹⁹ Wakacaya Sioni mwaami wa bene Amoli, ee, mukwiinga lusuno lwakwe ndwamuyayaya.

²⁰ Wakacaya Ogi mwaami wa kuBashani, ee, mukwiinga lusuno lwakwe ndwamuyayaya.

²¹ Shishi shabo wakashipa bantu bakwe ayi nshabo, ee, mukwiinga lusuno lwakwe ndwamuyayaya.

²² Wakashipa bene Isilaeli basebenshi bakwe, ee, mukwiinga lusuno lwakwe ndwamuyayaya.

²³ Wakatuyeeya nditwakalinga twakomwa, ee, mukwiinga lusuno lwakwe ndwamuyayaya.

²⁴ Wakatufuna kuswa mumaansa a balwani besu, ee, mukwiinga lusuno lwakwe ndwamuyayaya.

²⁵ Ngoopa cakulya kushilengwa shiyoya shoonse, ee, mukwiinga lusuno lwakwe ndwamuyayaya.

²⁶ Amulumbe Lesa wa kwiculu, ee, mukwiinga lusuno lwakwe ndwamuyayaya.