Kulumbaisha 135 - Baibo Busansulushi Bwa Libuku Ili

Lwiimbo lwakulumbaisha

¹ Amulumbaishe Mwaami Lesa! Amulumbaishe liina lya Mwaami Lesa. Amumulumbaishe mwebo nobasebenshi bakwe.

² Amulumbaishe mwebo nomusebensa muŊanda ya Mwaami Lesa. Ee, mwebo nomusebensela mulubansa lwa Ŋanda yakwe Lesa wesu.

³ Amulumbaishe Mwaami Lesa ceebo lakwe ngumubotu. Amwiimbe nyimbo shakulumbaisha liina lyakwe mukwiinga shilamusangalasha.

⁴ Mwaami Lesa wakasala Jakobo kuba wakwe, wakasala Isilaeli ayi mbuboni bwakwe mbwaasunishi.

⁵ Ndishi kwaamba ayi Mwaami Lesa ngumunene, ngumunene kwiinda balesa bamwi boonse.

⁶ Ulacita cili coonse ncaasuni kwiculu nabi pacishi ca panshi. Ndushinisho ulashicita mulweenge apanshi peene pandulo.

⁷ Ngoonyamuna makumbi kuswa kweela cishi, ngoolengesha kubeka kwa mfula pakuloka, alimwi ngooleta muuwo kuswa kumatala akwe.

⁸ Mwaami Lesa ngowakacaya baana bakwiiya ba kuIjipiti, ncakwiila baana bakwiiya boonse ba bantu aba banyama.

⁹ Wakacita shaankamiko ashitondesho sha nkusu sha kwiculu pakati kabo. Ee, kwaamba ayi ape mulandu Falawo abacinenenene bakwe.

¹⁰ Ngowakanyonyoola mishobo ya bantu iinji akucaya bamaami beshinkusu

¹¹ mbuli Sioni mwaami wa bene Amoli, Ogi mwaami wa kuBashani abamaami boonse ba kuKenani.

¹² Shishi shabo wakashipa kubantu bakwe ayi nshabo, ee, wakashipa kubantu bakwe bene Isilaeli.

¹³ NoBaami baLesa, liina lyanu ndyamuyayaya. Mulipukite kumashalane oonse.

¹⁴ Mwaami Lesa ulaakufuninina bantu bakwe akufwita nkumbu basebenshi bakwe.

¹⁵ Sombi balesa babo mba silifa agolodi abo bakabumbwa amaansa a bantu.

¹⁶ Milomo balicite, sombi tabaambi. Meenso balicite, sombi tabalashi.

¹⁷ Matwi balicite, sombi tabanyumfwi alimwi tabakoonshi akuyoya.

¹⁸ Abo bababumba balikoshenye ambabo, ee, abaabo boonse bacinkite manungo mubalesa abo.

¹⁹ Mwebo nobene Isilaeli amulumbaishe Mwaami Lesa. Amumulumbaishe mwebo nobamulunyungu lwakwe Aloni.

²⁰ Nobamumukowa wakwe Lefi amulumbaishe Mwaami Lesa. Amulumbaishe Mwaami Lesa mwebo nomumulemeka.

²¹ Aalumbaishikwe Mwaami Lesa kuswa kuSiyoni, ncakwiila amumulumbaishe uyo ukala muJelusalemu. Amulumbaishe Mwaami Lesa!