Kulumbaisha 132 - Baibo Busansulushi Bwa Libuku Ili

Lwiimbo lwakulumbaisha ŋanda yakwe Lesa

Lwiimbo lwa pakutanta.

¹ NoBaami baLesa amwiibaluke Defedi alimwi amapensho oonse ngaakeendaamo.

² Amwiibaluke nobaLesa mbwaakashomesha, ee, mbwaakashomesha cakulumbila kuli ndimwe noBeshinkusu bakwe Jakobo.

³ Wakaamba ayi, “Muŋanda yangu teshi nkenjileemo, pabulo bwangu teshi nkooneewo sobwe.

⁴ Teshi nkookesheewo nabi koona tulo,

⁵ kushikila nkacane musena wakulambililamo Mwaami Lesa, ncakwiila Ŋanda ya Ushinkusu wakwe Jakobo.”

⁶ Twakanyumfwa shaLibokoshi lya Cipangano muEfulata. Twakalicana mumyuunda ya ndabala ya Jeyalimu.

⁷ Lyalo twakaamba ayi, “Katiya kumusena uko Mwaami Lesa nkwaakala, tiya tukamulambile kunembo lya cuuna cakwe.”

⁸ Amunyamuke noBaami baLesa, muboolele kuŊanda yanu. Muboolele aLibokoshi lya Cipangano ilyo liimikanina nkusu shanu.

⁹ Bapailishi banu abafwale bululami anga ncakufwala. Abalo bantu banu basalalite kabeemba cakusangalala.

¹⁰ NoBaami baLesa ceebo cakushomesha kwanu kuli Defedi musebenshi wanu, mutakaki mwaami uyo ngomwakasala kwiinda mukumunanika mafuta.

¹¹ Mwaami Lesa wakashomesha cakulumbila kuli Defedi. Kushomesha uko nkweshi akabule kupilula. Wakashomesha ayi, “Womwi pakati ka bana bako basankwa ulaakulela kuswa ndiwe.

¹² Na bana bako basankwa bakalaame cipangano cangu alimwi na bakakonkele kwiisha kwangu, bwaami bwako bulaakunoolibo pabamulunyungu lwabo kwalyoonse alyoonse.”

¹³ Mwaami Lesa wakasala Siyoni, kwaamba ayi ŋanda yakwe ibe mumo.

¹⁴ Wakaamba ayi, “Ono muno mweshi nookala kwalyoonse alyoonse. Ee, mweshi nookala pacuuna ca bwaami mukwiinga ndisuniimo.

¹⁵ Ndabala ya Siyoni ndaakwiipa shoonse shiyandika. Ndaakupa bakandu bekala mumo shakulya shiinji shakukuta.

¹⁶ Ndaakupa shoolwe bapailishi ba mumo mushintu shoonse nsheshi bakanoocita. Bantu bekalaamo balaakwiimba cakusangalala.

¹⁷ Uko nkweshi nkabike womwi pabamulunyungu lwakwe Defedi mwaami shinkusu. Anu ndaakulengesha bwaami bwa mwaami ngondakasala kutolelela pabamulunyungu lwakwe.

¹⁸ Ndaakulensha nsoni balwani bakwe, sombi buleelo bwakwe bulaakuyuma akuswitilila.”