Kulumbaisha 128 - Baibo Busansulushi Bwa Libuku Ili

Cilambu ca kunyumfwila mwaami Lesa

Lwiimbo lwa pakutanta.

¹ Balicite coolwe abo banyumfwila Mwaami Lesa, ncakwiila abo beenda munshila yakwe.

² Ulaakulya shisepo isho nshaasebensela. Ulaakupekwa coolwe amilimo yakwe ilaakuswitilila.

³ Mukaako ulaakuba anga ngumunyansa ucata bunene muŋanda yako. Bana bako basankwa balaakuba anga ninsoonseela sha maolifi kushinguluka tebulu yako.

⁴ Muntu unyumfwila Mwaami Lesa, mbweshi akapekwe coolwe ubo.

⁵ Mwaami Lesa aakupe coolwe kuswa kuSiyoni. Ubone kuswitilila kwa Jelusalemu munshiku shoonse sha buumi bwako.

⁶ Koocendela buumi kwaamba ayi ukabone bamashikulu bako. Luumuno alube pabene Isilaeli.