Kulumbaisha 127 - Baibo Busansulushi Bwa Libuku Ili

Lwiimbo lwakulumbaisha bubotu bwakwe Lesa

Lwiimbo lwa pakutanta lwakwe Solomoni.

¹ Na Mwaami Lesa wabula kuyaka ŋanda, ngayi bayaki basebenselabo kapongo kafwite. Na Mwaami Lesa wabula kulindilila ndabala, ngayi beshikulindilila balipenshabo akutoona.

² Mulalipenshabo kubuka macuunsacuunsa alimwi akucelwa kuya mukoona, kwaamba ayi mucane cakulya kwiinda mukuyuwaana. Ceebo Mwaami Lesa ulapa cakulya kubaabo mbwaasuni kabacilete.

³ Baana ncipo kuswa kuMwaami Lesa, ncakwiila ncilambu ncaatupa.

⁴ Baana basankwa muntu mbwaashala kaacili cikula bwangu, bali anga njimifwi mumaansa a shilumamba.

⁵ Ulicite coolwe muntu ucite mifwi iinji, ceebo teshi akakomweewo aakukumana abalwani bakwe kumwiinjililo.