Kulumbaisha 122 - Baibo Busansulushi Bwa Libuku Ili

Lwiimbo lwakulumbaisha Jelusalemu

Lwiimbo lwa pakutanta. Lwiimbo lwakwe Defedi.

¹ Ndakasangalala ndibakaŋambila ayi, “Katiya kuŊanda ya Mwaami Lesa.”

² Ono anaapa myeendo yesu iliimfwi mukati ka minjililo, ee, yenjila mukati kako, webo oJelusalemu.

³ Jelusalemu nindabala yakayakwa kabotu, yakeemikwa kabotu alimwi ileebelekwa.

⁴ Uko nkokooko mikowa yoonse nkoiya, ee, mikowa ya Mwaami Lesa. Ilaya mukulumba Mwaami Lesa kweelana amulasho wakapekwa bene Isilaeli.

⁵ Uko nkokwakabikwa shuuna shakoombolosheshaawo, ee, shuuna sha bwaami bwa mumukowa wakwe Defedi.

⁶ Amupailile luumuno muJelusalemu. Mupaile ayi, “OJelusalemu, bantu abo bakusuni baswitilile.

⁷ Amube luumuno mukati ka lubumbu lwako, akutalisukama mumaanda ako a bwaami.”

⁸ Ceebo ca bamakwesu abeensuma ndaamba ayi, “Luumuno lwikale mukati kako.”

⁹ Ceebo ca Ŋanda ya Mwaami Lesa, Lesa wesu, ndaakukupailila ayi uswitilile.