Kulumbaisha 119 - Baibo Busansulushi Bwa Libuku Ili

Milawo ya mwaami Lesa

¹ Balicite coolwe abo bekala cakubula kampenda, abo bacita kweelana amilawo ya Mwaami Lesa.

² Balicite coolwe abo bakonkela kwiisha kwa Mwaami Lesa, abo bamunyumfwila amyoyo yabo yoonse.

³ Bantu abo tababishi, sombi baleendabo munshila sha Mwaami Lesa.

⁴ Mwebo noBaami baLesa mwakapa milasho yanu iyo yeelete kunookonkelwa cakushomeka.

⁵ Inga cambotela abuumbi kushomeka kwaamba ayi nokweenda munshila shanu.

⁶ Na mbike maano kumilawo yanu yoonse, ingayi teshi nkalenshekwe nsoni.

⁷ Ndaakumulumbaisha amoyo ululeme na nkeeye milawo yanu iluleme.

⁸ Ndaakukonkela milasho yanu, mutakandekeleshi napaceyi.

Kunyumfwila milawo ya mwaami Lesa

⁹ Anu cikula bwangu inga wasalasha buyani nshila yakwe? Kwiindabo mukwikala kweelana amaswi anu.

¹⁰ Ndeelesha kumusebensela amoyo wangu woonse. Mutandeeki ayi nswe kumilawo yanu.

¹¹ Ndalama maswi anu mumoyo wangu, kwaamba ayi ntanoomubishisha.

¹² Amulumbaishikwe noBaami baLesa. Amunjiishe milasho yanu.

¹³ Ndaamba milawo yanu amulomo wangu, ee, milawo yoonse iswa kumulomo wanu.

¹⁴ Ndasangalala mukwiisha kwanu, kwiinda kuba abubile buli boonse,

¹⁵ Ndayeeya pamilasho yanu, akubika maano panshila shanu.

¹⁶ Ndasangalalila mumilasho yanu, ee, teshi nkasuulewo maswi anu.

Kusangalala kwa muntu ulama milawo ya mwaami Lesa

¹⁷ Amuncitile shibotu nemusebenshi wanu, kwaamba ayi kaanceendela buumi akukonkela maswi anu.

¹⁸ Amucalule meenso angu kwaamba ayi mbone, kubona shintu shikankamika mumilawo yanu.

¹⁹ Ndi mweensu pacishi ca panshi cino, aboobo mutanshishi milawo yanu.

²⁰ Moyo wangu ulisunishi abuumbi kunyumfwa shamilawo yanu lyoonse.

²¹ Mwebo mulakalalila balisumpula, ee, abo bakashinganwa mukwiinga tabakonkeli milawo yanu.

²² Amuŋangulule kumucobwe wabo amunyansho ceebo ndakonkela kwiisha kwanu.

²³ Nabi bamaami babungana akuncobola, nebo nemusebenshi wanu ndanoobikitebo maano mumilasho yanu,

²⁴ Ndasangalalilabo mukwiisha kwanu, ee, kwiisha kwanu nkokumpa maano.

Kuyandisha kunyumfwila milawo ya mwaami Lesa

²⁵ Ntokwalabanganabo mubulongo, amumbuushe kweelana amaswi anu.

²⁶ Ndindakamulwiita shoonse nshendakacita, mwakankumbula. Anu amunjiishe milawo yanu.

²⁷ Munjiishe kunyumfwisha bwaamba milasho yanu, lyalo ndyeshi nkondwe kunyumfwa shamilimo yanu ikankamika.

²⁸ Buumba bwankopola abuumbi. Amunjuumyeyumye kweelana amaswi anu.

²⁹ Amunkaashe kweenda munshila shibiibi. Mumfwite luse kwiinda mukunjiisha milawo yanu.

³⁰ Ndakasala kwikala mukushomeka, ndabika maano angu kumilawo yanu.

³¹ Ndakakatila kukwiisha kwanu noBaami baLesa, mutandekeleshi kwaamba ayi nenshekwe nsoni.

³² Ndeenda munshila ya milawo yanu ceebo mwakaangulula moyo wangu ayi kaamunyumfwila.

Mupailo wakusenga maano

³³ Nobaami baLesa, amunjiishe mboonjelete kukonkela milasho yanu. Ncakwiila ndyeshi nkeelaame kushikila kumamanino.

³⁴ Amumpe maano kwaamba ayi ndame milawo yanu, ee, kwaamba ayi nkeekonkele amoyo wangu woonse.

³⁵ Muntanjilile kwaamba ayi nkonkele milawo yanu, ceebo muli njiyo mooncana kusangalala.

³⁶ Amwiishe moyo wangu kusuna kwiisha kwanu. Ee, amunjiishe kusuna kwiisha kwanu kuteshi bubile.

³⁷ Amunkaashe kubika maano kushintu shitacite ncito. Amumpe buumi kweelana amaswi anu.

³⁸ Nemusebenshi wanu amuncitile kweelana ambomwakashomesha ee, kweelana ambomwakashomesha pabaabo bamunyumfwila.

³⁹ Amunkushe musebaanyo uyo ngoonoonda ceebo milawo yanu njibotu.

⁴⁰ Amubone mboonsunishi kukonkela milawo yanu, amumpe buumi bupya ceebo mwebo muliluleme.

Kucinka manungo mumilawo ya mwaami Lesa

⁴¹ NoBaami baLesa, amuntondeshe lusuno lwanu lutamaani. Amumpulushe kweelana ambomwakashomesha.

⁴² Lyalo ndaakukonsha kukumbula baabo bancobola, ceebo ndicinkite manungo mumaswi anu.

⁴³ Amunengeshe kukonsha kwaamba makani anu alushinisho, ceebo kulangila kwangu kuli mumilawo yanu.

⁴⁴ Ndanookonkela milawo yanu, ee, kwiikonkela kwalyoonse alyoonse.

⁴⁵ Ndanokweenda kaŋangulukite, ceebo ndakonkela milasho yanu.

⁴⁶ Ndaakwaamba kwiisha kwanu pameenso a bamaami. Teshi nkalenshekwewo nsoni.

⁴⁷ Ndasangalalila mumilawo yanu, mukwiinga milawo yanu ndiisuni.

⁴⁸ Milawo yanu iyo njeensuni ndeelemeka, alimwi milasho yanu ndeeyeeya akuyiiya.

Kushoma mumilawo ya mwaami Lesa

⁴⁹ Amwiibaluke maswi ngomwakampa nemusebenshi wanu, ncakwiila maswi anu ayo akampa kulangila.

⁵⁰ Moyo wangu wakalinga kushiite nabi mumapensho angu mukwiinga kushomesha kwanu kulampa buumi bupya.

⁵¹ Bantu balisumpula balancelebula lyoonsebo, sombi nebo nshifutatiliwo milawo yanu.

⁵² NoBaami baLesa milawo yanu ikulukulu ndayiibaluka alimwi ndacanaamo kukalikwa moyo.

⁵³ Ndakalala abuumbi pakubona bantu babiibi, bantu babiibi abo batakonkeli milawo yanu.

⁵⁴ Milasho yanu yaba nshenyimbo shangu, nshenyimbo shangu koonse kweenga kaambete.

⁵⁵ Mashiku ndamwiibaluka noBaami baLesa, alimwi ndakonkela milawo yanu.

⁵⁶ Nceencita lyoonse, nkukonkela milasho yanu.

Kushomeka kumilawo ya mwaami Lesa

⁵⁷ NoBaami baLesa ndimwe mumpa shiyandika shoonse mubuumi bwangu. Ndashomesha ayi ndaakunookonkela maswi anu.

⁵⁸ Ndamusenga amoyo wangu woonse, mumfwite nkumbu kweelana ambomwakashomesha.

⁵⁹ Ndindakayeeya panshila shangu, ndakasanduluka akukonkela kwiisha kwanu.

⁶⁰ Ndafwambaana kucita kweelana amilawo yanu, ncakwiila nshishingooki napaceyuubo.

⁶¹ Nabi bantu babiibi baŋanga antaambo, nebo teshi nkalubeeko kukonkela milawo yanu.

⁶² Ndabuka pakati ka mashiku ayi mulumbaishe. Ndamulumbaisha ceebo ca milawo yanu iluleme.

⁶³ Boonse abo bamusebensela mbeensuma, ee, abo boonse bakonkela milasho yanu.

⁶⁴ NoBaami baLesa, cishi ciliswitebo lusuno lwanu lutamaani. Amunjiishe milawo yanu.

Bubotu bwa milawo ya mwaami Lesa

⁶⁵ Amuncitile shibotu nemusebenshi wanu kweelana amaswi anu noBaami baLesa.

⁶⁶ Amumpe busongo alushibo lwakoombolosha, ceebo nebo ndashoma milawo yanu.

⁶⁷ Kaantana kuba mumapensho ndakalinga kusowekete, sombi cino ciindi ndakonkela maswi anu.

⁶⁸ Mwebo muli babotu anshemucita nshibotu, amunjiishe milasho yanu.

⁶⁹ Nakubi kwaamba ayi bantu balisumpula balambekesha, nebo ndakonkela milasho yanu amoyo wangu woonse.

⁷⁰ Bantu ba mushobo uyo mbayumu myoyo alimwi tabanyumfwi, sombi nebo ndakondwa mumilawo yanu.

⁷¹ Cakabota kwaamba ayi ncanikwe mumapensho ceebo ndakeeya milawo yanu.

⁷² Mulawo ngomwakampa ngubotu kwiinda kupekwa shuulu sha golodi asilifa.

Bululami bwa milawo ya mwaami Lesa

⁷³ Ndakalengwa akubumbwa kuswa kumaansaanu. Ono amumpe maano kwaamba ayi njiye milawo yanu.

⁷⁴ Abo bamulemeka kabasangalala na bambona ceebo nebo ndicinkite manungo mumaswi anu.

⁷⁵ NoBaami baLesa, ndishi kwaamba ayi milawo yanu ililuleme, alimwi mwakampa mulandu kweelana akushomeka kwanu.

⁷⁶ Lusuno lwanu lutamaani alunkalike moyo kweelana ambomwakanshomesha nemusebenshi wanu.

⁷⁷ Amumfwite nkumbu kwaamba ayi noocibukila buumi ceebo ndakondwa abuumbi mumilawo yanu.

⁷⁸ Bantu balisumpula abalenshekwe nsoni ceebo cakumbekesha. Sombi nebo ndanooyeeyabo pamilasho yanu.

⁷⁹ Bantu abo bamulemeka abese kuli ndime, ee, abese abo beshi kwiisha kwanu.

⁸⁰ Moyo wangu utabi akampenda kumilasho yanu, kwaamba ayi ntakalenshekwi nsoni.

Mupailo wakusenga kupulushikwa

⁸¹ Moyo wangu ulikopokete kulindilila lupulusho lwanu, sombi nebo ndicinkite manungo mumaswi anu.

⁸² Meenso angu acileka kulasha kabotu ceebo cakulangila nshemwakashomesha. Aboobo ntoomwiipusha ayi, “Ino mulaakuncafwa lili?”

⁸³ Nabi ntooboneka anga ninkomwe ya waini ya cipaya yakokonyana, kumilawo yanu nshilubiko napaceyi.

⁸⁴ Ino nemusebenshi wanu nindile ciindi cilaamfu buyani? Ino bantu batoompensha mulaakubapa lili mulandu?

⁸⁵ Bantu balisumpula, batakonkeli milawo yanu, bakaba shilindi ayi bateye ndime.

⁸⁶ Milawo yanu yoonse ilashomeka. Amuncaafwe ceebo bantu aba batoompensha kwakubula mulandu.

⁸⁷ Bakalinga pafwaafwi kuncaya ayi nswe pacishi ca panshi, sombi nebo teshi nkacilekeewo kukonkela milasho yanu.

⁸⁸ Amulame buumi bwangu kweelana alusuno lwanu lutamaani kwaamba ayi nkonkele kwiisha kwanu.

Kushoma mumilawo ya mwaami Lesa

⁸⁹ NoBaami baLesa maswi anu ngalyoonse alyoonse. Ncakwiila alishiite kwiculu kwamuyayaya.

⁹⁰ Kushomeka kwanu kulaboneka mumashalane oonsebo. Ndimwe mwakabika cishi mumusena wa ncico alimwi cinanooliiko.

⁹¹ Milawo yanu nkooicili asunu, ceebo shintu shoonse shilamusebensela.

⁹² Milawo yanu nitakwe kunsangalasha, sunu naakwiinga ndifwite mumapensho angu.

⁹³ Teshi nkasuulewo milasho yanu ceebo kwiinda muli njiyo mwakampa buumi bupya.

⁹⁴ Amumfuune mukwiinga ndi wanu, ndeelesha kukonkela milasho yanu.

⁹⁵ Bamucita shibi batoobelabelabo ayi banyonyoole, sombi nebo ndanookonkelabo kwiisha kwanu.

⁹⁶ Ndishi kwaamba ayi shintu shoonse shibotu shilicite meelelesho, sombi yalo milawo yanu teecitewo meelelesho.

Kusuna milawo ya mwaami Lesa

⁹⁷ Milawo yanu ndiisuni abuumbi! Ndayeeyabo pali njiyo lilaya mukwipila.

⁹⁸ Milawo yanu ilanengesha kuba musongo kwiinda balwani bangu mukwiinga ndayeeyabo pali njiyo lyoonse.

⁹⁹ Ndicite maano akunyumfwa kwiinda bamafundishi bangu boonse, ceebo ndayeeyabo pakwiisha kwanu.

¹⁰⁰ Ndi musongo kwiinda bamaloba, ceebo ndakonkela milasho yanu.

¹⁰¹ Nsheendi munshila shibiibi kwaamba ayi nkonkele kabotu maswi anu.

¹⁰² Nshilekiwo milawo yanu, ceebo ndimwe mwakanjiisha.

¹⁰³ Maswi anu alicite mise abuumbi mumulomo wangu, ncakwiila alicite mise kwiinda buuci.

¹⁰⁴ Ndaba abusongo kuswa mumilasho yanu. Aboobo ndipatite nshila yoonse ibiibi.

Milawo ya mwaami Lesa ngomumuni

¹⁰⁵ Maswi anu ndyelilampi lya myeendo yangu, ngomumuni umunikila nshila yangu.

¹⁰⁶ Ndakashomesha cakulumbila akushinisha ayi ndanookonkela milawo yanu iluleme.

¹⁰⁷ NoBaami baLesa mapensho angu alayoosha, amumpe buumi bupya kweelana amaswi anu.

¹⁰⁸ NoBaami baLesa, amutambule mipailo yangu yakumulumbaisha. Amunjiishe milawo yanu.

¹⁰⁹ Nakubi kwaamba ayi buumi bwangu buleendela mumaansa lyoonse, nebo nshilubiiwo milawo yanu napaceyi.

¹¹⁰ Bamucita shibi banteya koose, sombi nebo nshipambukiiwo mumilasho yanu.

¹¹¹ Milasho yanu mbobuboni bwangu bwamuyayaya. Ncakwiila mooncana kusangalala kwa moyo wangu.

¹¹² Moyo wangu uliimfwibo pakukonkela milasho yanu. Ee, ndaakunooikonkela kushikila kulufu.

Kutabililwa mumilawo ya mwaami Lesa

¹¹³ Ndibapatite bantu bacite myoyo yobilo, sombi nebo ndisunibo milawo yanu.

¹¹⁴ Mwebo ndimwe ciyubilo aliyawo lyangu. Mumaswi anu momuli kulangila kwangu.

¹¹⁵ Amuntalamuke mwebo nobamucita shibi kwaamba ayi nkonkele milawo yakwe Lesa wangu.

¹¹⁶ Amundaame kweelana akushomesha kwanu kwaamba ayi noocibukila buumi, Mutandekeleshi ayi nenshekwe nsoni mukulangila kwangu.

¹¹⁷ Amuncatilile kwaamba ayi mfunwe, lyalo ndanookonkela milasho yanu lyoonse.

¹¹⁸ Batakonkeli milasho yanu mulabakaka, ndushinisho kucenjela kwabo taaku mbokubete.

¹¹⁹ Bamucita shibi boonse mulabasowabo anga ngamatombe akuntantaala. Paceebo ceeco ndisunishi kwiisha kwanu.

¹²⁰ Mubili wangu ulatutuma ceebo cakuloonda ndimwe. Ndicite boowa ceebo ca koombolosha kwanu.

Kukonkela milawo ya mwaami Lesa

¹²¹ Ndacitabo shintu shiluleme alimwi shibotu. Aboobo mutandekeli mumaansa a beshikundyatilila.

¹²² Amushomeshe ayi mutooncafwa nemusebenshi wanu. Mutandekeli mumaansa a balisumpula ayi bandyatilile.

¹²³ Meenso angu acileka kulasha kabotu kukulangila lupulusho lwanu, ee, kulangila kushomesha kwanu kululeme.

¹²⁴ Amuncitile kweelana alusuno lwanu lutamaani nemusebenshi wanu akunjiisha milasho yanu.

¹²⁵ Amumpe busongo ceebo ndi musebenshi wanu, kwaamba ayi nshibe bwaamba milasho yanu.

¹²⁶ NoBaami baLesa, ciindi cashikila ncemweelete kucitawo comwi ceebo bantu batoopwaya milawo yanu.

¹²⁷ Nebo milawo yanu ndiisuni kwiinda golodi, ee, ndiisuni kwiinda golodi wiine wiine.

¹²⁸ Paceebo ceeco ndakonkela milasho yanu yoonse. Ndipatite nshila shoonse shibiibi.

Kusunisha kukonkela milawo ya mwaami Lesa

¹²⁹ Kwiisha kwanu kulakankamika, aboobo ndaakukonkela.

¹³⁰ Kupandulula maswi anu kulapa mumuni, kulapa busongo kuli baabo batabucite.

¹³¹ Ntootweekabo kaandakeme kumulomo ceebo cakusunisha milawo yanu.

¹³² Amucebuke akunyumfwila nkumbu, kweelana ambomunyumfwila nkumbu abo bamusuni.

¹³³ Amuŋenshe kweelana amaswi anu, mutaleki shibiibi kulela buumi bwangu.

¹³⁴ Amundubule kuswa kubaabo bandyatilila, kwaamba ayi nkonkele milasho yanu.

¹³⁵ Amunyumfwile nkumbu nemusebenshi wanu akunjiisha milasho yanu.

¹³⁶ Amubone minsonshi yangu mboitookunka anga ngumulonga, ceebo ca bantu kusuula milawo yanu.

Bululami bwa milawo ya mwaami Lesa

¹³⁷ Muliluleme noBaami baLesa, akwalo koombolosha kwanu nkubotu.

¹³⁸ Kwiisha kwanu kuliluleme, kulashomeka cakumaninina.

¹³⁹ Moyo wangu ulacisa abuumbi ceebo balwani bangu basuula maswi anu.

¹⁴⁰ Kushomesha kwanu nkwalushinisho, alimwi ncenkusunini nemusebenshi wanu.

¹⁴¹ Nacibi kwaamba ayi taaku mboombete alimwi ndanyanshikwa, kumilasho yanu nshilubiiko napaceyi.

¹⁴² Kululama kwanu nkwamuyayaya. Ayalo milawo yanu njalushinisho.

¹⁴³ Mapensho abuumba shampolela, nakubi boobo milawo yanu ilansangalasha.

¹⁴⁴ Kwiisha kwanu kuliluleme lyoonsebo. Amumpe busongo ayi noocibukila buumi.

Mupailo wakusenga kupulushikwa

¹⁴⁵ Ndamulilila amoyo wangu woonse. NoBaami baLesa amuncaafwe ayi nkonkele milasho yanu.

¹⁴⁶ Ndoolobesha kuli ndimwe, amumfuune kwaamba ayi nkonkele kwiisha kwanu.

¹⁴⁷ Ndabuka kumuyamaca ayi musenge lucafwo. Ncakwiila kulangila kwangu kuli mumaswi anu.

¹⁴⁸ Mashiku woonse ndaba acilabila kwaamba ayi nooyeeya pakushomesha kwanu.

¹⁴⁹ NoBaami baLesa amunyumfwe liswi lyangu ceebo ca lusuno lwanu lutamaani. Amufune buumi bwangu kweelana amilawo yanu.

¹⁵⁰ Bantu abo batoopinga kuncita shintu shibiibi bali pafwaafwi andime, sombi bali kulaale amilawo yanu.

¹⁵¹ Nakubi boobo mwebo muli pafwaafwi andime noBaami baLesa. Ayalo milawo yanu njalushinisho.

¹⁵² Kalekale ndakeeya mukwiisha kwanu ayi mwakakupanga kwaamba ayi kukalilile kwamuyayaya.

Mupailo wakusenga lucafwo

¹⁵³ Amubone mapensho angu akumpulusha, ceebo nshilubiiko milawo yanu.

¹⁵⁴ Amunjimikanine pamulandu wangu akundubula. Amumpe buumi bupya kweelana ambomwakashomesha.

¹⁵⁵ Bamucita shibi tabakoonshi kupuluka ceebo tabakonkeli milasho yanu.

¹⁵⁶ Inkumbu shanu nshiinji abuumbi noBaami baLesa. Amumpe buumi bupya kweelana amilawo yanu.

¹⁵⁷ Balwani bangu abeshikundyatilila mbaanji abuumbi, sombi nebo nshina kufutatilawo kale kwiisha kwanu.

¹⁵⁸ Ndafundookwa kumoyo na ndalanga bantu batashomeki ceebo tabakonkeli maswi anu.

¹⁵⁹ Amubone mboonsuni milasho yanu. NoBaami baLesa, amufune buumi bwangu kweelana alusuno lwanu lutamaani.

¹⁶⁰ Maswi anu oonse ngalushinisho, milawo yanu yoonse iluleme njamuyayaya.

Kulyaaba kumilawo ya mwaami Lesa

¹⁶¹ Bamaami balampensha kwakubula mulandu. Sombi moyo wangu ulatilimukabo maswi anu.

¹⁶² Kushomesha kwanu kulansangalasha anga ngumuntu wacana bubile buunji.

¹⁶³ Ndipatite akucimwa bubeshi buli boonse, sombi milawo yanu yalo ndiisuni.

¹⁶⁴ Ndamulumbaisha mankanda osanwe aobilo pabushiku abushiku ceebo cakoombolosha kwanu kululeme.

¹⁶⁵ Bantu abo basuni milawo yanu balicite luumuno lunene alimwi taaku ico ceenga cabawisha.

¹⁶⁶ NoBaami baLesa, ndalangila ayi mulaakumpulusha alimwi ndakonkela milawo yanu.

¹⁶⁷ Ndakonkela kwiisha kwanu, ceebo ndikusuni amoyo wangu woonse.

¹⁶⁸ Ndakonkela milasho yanu akwiisha kwanu, ceebo ndimwe mwishi nshila shangu shoonse.

Mupailo wakusenga lucafwo

¹⁶⁹ NoBaami baLesa, kulila kwangu akunyumfwike kuli ndimwe. Amumpe busongo kweelana amaswi anu.

¹⁷⁰ Kusenga kwangu akunyumfwike kuli ndimwe, Mumfuune kweelana ambomwakashomesha.

¹⁷¹ Mulomo wangu aumulumbaishe ceebo mwebo mulanjiisha milasho yanu.

¹⁷² Ndanookwiimbabo nyimbo shaamba pamaswi anu ceebo milawo yanu yoonse ililuleme.

¹⁷³ Kamulibambite kuncafwa lyoonse mukwiinga ndakasala kukonkela milasho yanu.

¹⁷⁴ Nobaami baLesa, ntoolangilabo lupulusho lwanu. Ncakwiila milawo yanu ilansangalasha.

¹⁷⁵ Nemwandeka ayi noocibukila buumi kwaamba ayi mulumbaishe, ayalo milawo yanu aincaafwe.

¹⁷⁶ Ndeengaila anga nimbelele isowekete. Amunyandoole nemusebenshi wanu, ceebo nshilubiiko milawo yanu.