Kulumbaisha 118 - Baibo Busansulushi Bwa Libuku Ili

Mupailo wakulumba ceebo cakukoma

¹ Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.

² Bene Isilaeli abaambe ayi, “Lusuno lwakwe ndwamuyayaya.”

³ Bamulunyungu lwakwe Aloni abaambe ayi, “Lusuno lwakwe ndwamuyayaya.”

⁴ Abo balambila Mwaami Lesa abaambe ayi, “Lusuno lwakwe ndwamuyayaya.”

⁵ Ndindakalinga mumapensho ndakapaila kuMwaami Lesa. Alakwe wakankumbula akuŋangulula kuswa mumapensho.

⁶ Mwaami Lesa uli anebo, teshi nkaloondeewo. Ino muntu inga wancitanshi?

⁷ Mwaami Lesa uli anebo, ngooncafwa, aboobo ndaakusekelela kukoma pabalwani bangu.

⁸ Ncibotu kuyuba muMwaami Lesa, kwiinda kucinka manungo mumuntu.

⁹ Ncibotu kuyuba muMwaami Lesa, kwiinda kucinka manungo mubamaami.

¹⁰ Balwani bangu bamumishobo yoonse bakanshinguluka, sombi ndakabanyonyoola kwiinda munkusu sha Mwaami Lesa.

¹¹ Ncakwiila bakanshinguluka akumbika pakati, sombi ndakabanyonyoola kwiinda munkusu sha Mwaami Lesa.

¹² Bakambunganina anga ninsuki, sombi bakamana calubilo mbuli mulilo wa mabuba. Ncakwiila ndakabanyonyoola kwiinda munkusu sha Mwaami Lesa.

¹³ Bantu bakandwana cakuyanda kunkoma, sombi Mwaami Lesa wakesa mukuncafwa.

¹⁴ Mwaami Lesa ngoompa nkusu alimwi ndamwiimbila, mukwiinga ngomupulushi wangu.

¹⁵ Ono amunyumfwe ciyobeyobe cakusangalala mumisumba ya baluleme. Batokwiimba nyimbo shakusangalala mukwiinga bakoma. Batokwaamba ayi, “Nkusu sha Mwaami Lesa shiindaawo shacita shintu shikankamika!

¹⁶ Nkusu sha Mwaami Lesa shiindaawo shaswitilila. Nkusu sha Mwaami Lesa shiindaawo shacita shintu shikankamika!”

¹⁷ Ono kufwa sobwe, ndanoocili muumi, kushikila nkaambilishe Mwaami Lesa nshaakancitila.

¹⁸ Amubone! Mwaami Lesa wakanyinsha mumapensho aanji, sombi taakwe kunsuminisha ayi mfwe.

¹⁹ Amuncalwite mulyango wa kuŊanda yanu, ndaakwinjila akulumba Mwaami Lesa.

²⁰ Uyu ngomulyango wa Mwaami Lesa, mpowaawa pakonsha kwinjililabo baluleme.

²¹ Ndamulumba noBaami baLesa ceebo mwakakumbula mipailo yangu. Ncakwiila mwebo ndimwe bapulushi bangu,

²² Libwe bayaki ndibakakaka, lyakaba ndyelibwe liyandika lya mulikonko lya ŋanda.

²³ Mwaami Lesa ngowakacita ceeci, alimwi ncintu cikankamika abuumbi mumeenso esu.

²⁴ Ubu mbobushiku Mwaami Lesa mbwaakalenga, Atusangalale akukondwa mubushiku ubu.

²⁵ NoBaami baLesa amutupulushe, ee, amutulengeshe kuswitilila.

²⁶ Ulicite coolwe uyo utoosa muliina lya Mwaami Lesa. Tulamulumbaishisha muŊanda ya Mwaami Lesa.

²⁷ Mwaami Lesa ncakwiila nguLesa, ulatucitila shibotu. Amutalike kusekelela kamucite amalala mumaansa, tibili muye mukashiike akucipaililo.

²⁸ Mwebo muli baLesa bangu, ndanoomulumba. Muli baLesa bangu, ncakwiila ndanoomusumpula.

²⁹ Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.