Kulumbaisha 116 - Baibo Busansulushi Bwa Libuku Ili

Kulumbaisha mwaami Lesa kwa muntu wafunwa kulufu

¹ Mwaami Lesa ndimusuni mukwiinga ulanyumfwa mipailo yangu. Ndushinisho ulanyumfwa ndyeensenga ayi anyumfwile nkumbu.

² Ceebo cakwaamba ayi ulankutika, ndanoomulilila kwabuumi bwangu boonse.

³ Toose twa lufu twakalinga kunshingulukite, shiyoosha sha mumusena wa bafu shakaba pali ndime. Mapensho akuungumana shakalinga shantentula.

⁴ Lyalo ndakapaila kuMwaami Lesa ayi, “NoBaami baLesa, ndamusenga amumfuune.”

⁵ Mwaami Lesa ngushiluse alimwi uliluleme, Ncakwiila Lesa wesu ulicite nkumbu shiinji.

⁶ Mwaami Lesa uleemikanina balibombya, wakampulusha ndindakalinga mumapensho anene.

⁷ Omoyo wangu kala panshi akootobala, ceebo Mwaami Lesa ulancitila shibotu.

⁸ Mwebo noBaami baLesa mwakampulusha kuswa kulufu. Ncakwiila ndimwe mwakaŋumbulusha mukulila kwangu, alimwi akuncafwa kwaamba ayi ntakomwi.

⁹ Aboobo ndeenda pameenso a Mwaami Lesa mucishi cino ca bantu boomi.

¹⁰ Nabi ndindakaamba ayi, “Ndapeenga abuumbi,” ndakalinga kucicite lushomo.

¹¹ Ndakalinga kushoma nabibo ndindakanyumfwa boowa akwaamba ayi, “Taaku muntu nabi womwi weenga washomeka.”

¹² Anu Mwaami Lesa nebo inga ndamupanshi pashintu shibotu shoonse ishi nshancitila?

¹³ Ndaakupa cipo ca waini kuMwaami Lesa, kumulumba mukwiinga wakampulusha.

¹⁴ Ndaakucita shoonse nshendakashomesha cakulumbila. Ndaakucita boobo pameenso abantu bakwe boonse.

¹⁵ Lufu lwa bantu ba Mwaami Lesa, ncakwiila lulamucisa abuumbi mwiine.

¹⁶ NoBaami baLesa ndushinisho ndi musebenshi wanu. Ndi mwaana wa mwanakashi musebenshi wanu ushomeka. Mwakaŋangulula kuswa muncetani sha lufu.

¹⁷ Ndaakubenga mulambu wakulumba kuli ndimwe alimwi akupaila muliina lyanu noBaami baLesa.

¹⁸ Ndaakucita shoonse nshendakashomesha cakulumbila. Ndaakucita boobo pameenso a bantu bakwe boonse,

¹⁹ mulubansa lwa Ŋanda ya Mwaami Lesa, nkokwaamba ayi pakati kako oJelusalemu. Amulumbaishe Mwaami Lesa!