Kulumbaisha 115 - Baibo Busansulushi Bwa Libuku Ili

Lesa womwi walushinisho

¹ Kuteshi ndiswe noBaami baLesa, ee, kuteshi ndiswe, sombi ndimwebo nweenka nomweelete kulemekwa, ceebo ca lusuno lwanu lutamaani akushomeka kwanu.

² Ceebonshi mishobo imwi nceiipushila ayi, “Uli kuli Lesa wabo?”

³ Ndushinisho Lesa wesu uli kwiculu. Ncakwiila ulacita cili coonse ncaasuni.

⁴ Sombi balesa babo mba silifa agolodi abo bakabumbwa amaansa a bantu.

⁵ Milomo balicite, sombi tabaambi. Meenso balicite, sombi tabalashi.

⁶ Matwi balicite, sombi tabanyumfwi. Mashono balicite, sombi tabanunshiwo.

⁷ Maansa balicite, sombi taaku ncaacata. Myeendo balicite, sombi tabeendi. Taaku amaswi aswa pamikolomenwa yabo.

⁸ Abo bababumba balikoshenye ambabo, ee, abaabo boonse bacinkite manungo muli mbabo.

⁹ Amucinke manungo muMwaami Lesa mwebo nobene Isilaeli, ngoomucafwa alimwi ndyeliyawo lyanu.

¹⁰ Amucinke manungo muMwaami Lesa mwebo nobamulunyungu lwakwe Aloni, ngoomucafwa alimwi ndyeliyawo lyanu.

¹¹ Amucinke manungo muMwaami Lesa, mwebo nomumulambila, ngoomucafwa alimwi ndyeliyawo lyanu.

¹² Mwaami Lesa ulatwiibaluka alimwi ulaakutupa coolwe. Ulaakupa coolwe bamulunyungu lwakwe Isilaeli, ee, ulaakupa coolwe abamulunyungu lwakwe Aloni.

¹³ Ulaakupa coolwe bantu abo bamulemeka, balemekwa abatalemekwi boonse ulaakubapa coolwe.

¹⁴ Mwaami Lesa aamupe baana baanji, mwebo abamulunyungu lwanu.

¹⁵ Aamupe coolwe Mwaami Lesa uyo wakalenga liculu acishi ca panshi.

¹⁶ Kwiculu kwiine nkwa Mwaami Lesa, sombi cishi ca panshi wakacipa kubantu

¹⁷ Bafu tabalumbaishi Mwaami Lesa, abo boonse baya kumusena wa bafu tabamulumbaishi.

¹⁸ Sombi swebo sotucili boomi ndiswe tulumbaisha Mwaami Lesa. Ndiswe tumulumbaisha cino ciindi kushikila muyayaya. Amulumbaishe Mwaami Lesa!