Kulumbaisha 112 - Baibo Busansulushi Bwa Libuku Ili

Kusangalala kwa muntu mubotu

¹ Amulumbaishe Mwaami Lesa! Ulicite coolwe muntu uloonda Mwaami Lesa, muntu usangalala mukulama milawo yakwe.

² Bana bakwe balaakuba ankusu shiinji mucishi, bamulunyungu lwakwe balaakupekwa coolwe.

³ Bamuŋanda yakwe balaakuba abuboni buunji, ndushinisho bamuŋanda yakwe balaakunooluleme lyoonse alyoonse.

⁴ Nabi kube munshinshe, lakwe muntu ululeme uleenda mumuni. Ee, kuli baabo beshiluse, beshinkumbu alimwi baluleme kuli mumuni.

⁵ Shibotu shilaya kumubotu moyo ukongwesha cakutalangila mpindu. Ee, shilaya kumuntu uyo weensha milimo yakwe cabululami.

⁶ Ndushinisho teshi akatenkaanishikwewo, sobwe. Muntu ululeme ulaakunokwiibalukwa lyoonse alyoonse.

⁷ Teshi akaloonde nabi akanyumfwe makani abiibi moyo wakwe nguyumu ceebo ulicinkite manungo muMwaami Lesa.

⁸ Lakwe taakushi moyo alimwi taaloondiiwo. Kumeelelesho ulaakubona ayi wabakoma balwani bakwe.

⁹ Ulaaba shipo shakwe kubakandu camoyo woonse. Bululami bwakwe mbwalyoonse alyoonse. Ulaakuba ankusu alimwi ulaakulemekwa.

¹⁰ Muntu mubiibi ulaakushibona akukalala. Ulaakulumanya meeno akuya cinyanga tibili wafwa. Kulangila kwakwe teshi kukacitikeewo.