Kulumbaisha 111 - Baibo Busansulushi Bwa Libuku Ili

Kulumbaisha mwaami Lesa

¹ Amulumbaishe Mwaami Lesa! Ndaakulumbaisha Mwaami Lesa amoyo wangu woonse, ee, ndaakumulumbaisha pakati ka libungano lya bantu bakwe baluleme.

² Milimo ya Mwaami Lesa njinene abuumbi, ilayeeyekwa abantu boonse abo basangalala muli njiyo.

³ Milimo yakwe njabulemu alimwi njabwaami. Bululami bwakwe mbwalyoonse alyoonse.

⁴ Wakalengesha ayi milimo yakwe ikankamika inokwiibalukwa. Ncakwiila Mwaami Lesa ngushiluse alimwi ngushinkumbu.

⁵ Ngoopa shakulya bantu bamulemeka. Uleebaluka cipangano cakwe ciindi coonse

⁶ Wakatondesha bantu bakwe nkusu sha milimo yakwe kwiinda mukubapa shishi sha mishobo imwi.

⁷ Milimo yakwe ilashomeka alimwi ililuleme, ayalo milasho yakwe yoonse ilashomeka.

⁸ Milasho yakwe njalyoonse alyoonse, yakapekwa mukushomeka abululami.

⁹ Wakapulusha bantu bakwe, wakapanga cipangano citamaani ambabo. Liina lyakwe lilisalalite alimwi lilaloondesha.

¹⁰ Kuloonda Mwaami Lesa ngomatalikilo a busongo. Boonse abo bakonkela milasho yakwe mbobacite lushibo lwiine lwiine. Aalumbaishikwe lyoonse alyoonse.