Kulumbaisha 110 - Baibo Busansulushi Bwa Libuku Ili

Mwaami Lesa amwaami wakwe ngwaakasala

Lwiimbo lwakwe Defedi.

¹ Mwaami, Lesa wakaambila mwaami wangu ayi, “Kala kulyaansa lyangu lyalulyo kushikila nkaalule balwani bako kwaamba ayi babe mpopakulyata myeendo yako.”

² Mwaami Lesa ulaakukomenesha bwaami bwako bwa nkusu kuswa kuSiyoni. Ndushinisho ulaakulela pakati pabalwani bako.

³ Bashilumamba bako balaakulyaaba amyoyo yoonse pabushiku bwa nkondo. Bacikula bwangu balaakwisa kuli ndiwe macuunsacuunsa bweenka mbuli mume patulundu tusalalite.

⁴ Mwaami Lesa wakashomesha cakulumbila alimwi teshi akayeeyewo bumbi. Wakaamba ayi, “Ulaakunoolibo mupailishi lyoonse, bupailishi ubo buli mbuli bwakalinga kucite Melikisedeki.”

⁵ Mwaami Lesa uli kulyaansa lyako lyalulyo, ulaakupwayoola bamaami pabushiku bwa bukali bwakwe.

⁶ Ulaakoombolosha mishobo yoonse. Ulaakususha mituntu ya bantu mumusena wakulwanina akupwayoola bamaami ba mucishi ca panshi coonse.

⁷ Ulaakunwa maanshi amukalonga kali munshaanshila. Lyalo ulaakwiinuna mutwi ceebo cakukoma.