Kulumbaisha 109 - Baibo Busansulushi Bwa Libuku Ili

Kutongooka kwa muntu uli mumapensho

Kumwendeleshi wa bwiimbi. Lwiimbo lwakwe Defedi.

¹ NobaLesa abo mboonumbaisha, mutoomunibo tontolo!

² Bantu babiibi, babeshi batoondwana, ee, bacalula milomo yabo akwaamba shakumbekesha.

³ Balaamba shintu shibiibi pali ndime, ndushinisho balandwana pataapu aceebo.

⁴ Balo balandwana nabi nebo ndibasuni, nabi bancite boobo, nebo ndabapaililako.

⁵ Balambooshela bubi pabubotu mbombacitila, alimwi balambooshela lupato palusuno ndoombatondesha.

⁶ Amusale muntu mubiibi kwaamba ayi oomboloshe mulwani wangu. Amulengeshe umwi pakati ka balwani bakwe ayi amupe mulandu.

⁷ Pakoomboloshekwa aacaninwe mulandu, Ee, amupailo wakwe aube cilubo.

⁸ Nshiku sha buumi bwakwe shifwiimpishikwe. Muntu umwi aabwese musena wakwe wa butanjilili.

⁹ Bana bakwe ababe bana banshiwa, alakwe mukaakwe acaale mukalubinje.

¹⁰ Bana bakwe bakeengaile akuya busengelela. Bakatandwe kuswa mushituuka shabo.

¹¹ Uyo ngwaakakongweta aakamunyaye shoonse nshaacite, beensu abakasaale shoonse isho nshaakayuwila.

¹² Kutabi muntu nabi womwi weshi amufwite nkumbu, nabi kufwita nkumbu banabanshiwa bakwe.

¹³ Bamulunyungu lwakwe boonse abamane kufwa, cakwaamba ayi kutakabi wiibaluka liina lyakwe mulishalane litoosa.

¹⁴ Mwaami Lesa akeebaluke shibiibi sha bamashali babo bakulukulu alimwi atakalekeleliiwo shibiibi sha banyina.

¹⁵ Mwaami Lesa kaaibaluka shibiibi shabo lyoonsebo sombi balo abakaluubwe cakumaninina pacishi ca panshi.

¹⁶ Ceebo lakwe taakalinga kuyeeyawo kufwita babye nkumbu. Sombi wakalinga kupensha akucaya bakandu, bataaku mbobabete abapengete.

¹⁷ Wakalinga mukondwa mashingo, ono alakwe ashinganwe. Taakalinga kusuni kupa coolwe, ono alakwe acimweendele palaamfu.

¹⁸ Wakalinga kushibite kushingana babye bweenka bushibite kufwala. Ono akumuboolele akumulokela anga nimfula. Ee, abe mbuli mafuta atoonjila mumafuwa akwe.

¹⁹ Mashingo aya aamufwekeleshe bweenka mbuli cakufwala, aakamushinguluke lyoonse bweenka mbuli laamba.

²⁰ NoBaami baLesa, amupe mulandu balwani bangu munshila iyi, ee, abo baamba shibiibi pali ndime.

²¹ Sombi noBaami baLesa Beshinkusu shoonse, amuncaafwe kweelana akushomesha kwanu. Amumfuune ceebo ca bubotu bwa lusuno lwanu lutamaani.

²² Nebo ndi mukandu alimwi taaku mboombete. Moyo wangu ulicisitwe abuumbi.

²³ Ntooya bushiminganabo anga ncimfule ca macolesha. Ntootolaanishikwabo amuuwo anga ncisoshi.

²⁴ Mumanungo angu mwatontola ceebo cakutalya. Ncakwiila ndacaalabo mafuwa eenka.

²⁵ Ndaba shikusekwa kubaabo beshikumbekesha. Na bambonabo, balatalika kulipukumuna mitwi.

²⁶ NoBaami baLesa, baLesa bangu, amuncaafwe, mumfuune ceebo ca lusuno lwanu lutamaani.

²⁷ Balwani bangu abeshibe ayi ndyaansa lyanu lyakamfuna. Ee, abeshibe kwaamba ayi ndimwe noBaami baLesa, mwakancafwa.

²⁸ Nabi banshingana, mwebo munanoompa coolwe. Na bandwana, mwebo munanoobalensha nsoni. Sombi nebo nemusebenshi wanu nanoosangaletebo.

²⁹ Balwani bangu abalenshekwe nsoni, ee, nsoni shibafwekeleshe anga ncakufwala.

³⁰ Mwaami Lesa ndaakumulumbaisha abuumbi amulomo wangu. Ndaakumulumbaisha pakati ka libungano lya bantu.

³¹ Ceebo uleemikana kulyaansa lyalulyo lwa mukandu ayi amumfuune. Ee, ulamufuna kuli baabo bamupa mulandu wakucaikwa.