Kulumbaisha 108 - Baibo Busansulushi Bwa Libuku Ili

Mupailo wakusenga lucafwo pakulwana

Lwiimbo lwakwe Defedi.

¹ Ono moyo wangu ulicite lushomo nobaLesa. Ncakwiila nshintootenkaana napaceyi. Ndaakunoomwiimbila akumulumbaisha.

² Ono omoyo wangu libambe! Okalumbu kangu libambe! Ceebo ndyeelete kucesha bushiku.

³ NoBaami baLesa ndaakumulumbaisha pakati ka mishobo. Ndaakwiimba nyimbo shakulumbaisha ndimwe pakati ka bantu.

⁴ Mukwiinga lusuno lwanu lutamaani ndunene cakushika akwiculu, akwalo kushomeka kwanu cakushika akumakumbi.

⁵ NobaLesa amutondeshe nkusu shanu mwiculu, bulemu bwanu abuboneke pacishi ca panshi coonse!

⁶ Amutulengeshe kukoma kwiinda munkusu shanu, amukumbule mipailo yesu. Ee, kwaamba ayi bantu abo mbomusuni, bafunwe.

⁷ Ono Lesa waamba kuswa kuŋanda yakwe isalalite ayi, “Cakukoma ndaakubaanya ndabala ya Shekemu, acalo cinyika ca Sakoti ndaakucibaanya bantu bangu.

⁸ Gilyadi ngwaangu alakwe Manase ngwaangu. Efuleemu ncecimpoompo cangu. Juda njenkoli yangu ya bwaami.

⁹ Moabu njembale yangu yakusambilaamo, alimwi nkwabilo shangu ndaakushiwaala pali Edomu. Ndaakoolobesha cakukoma pabene Filisiti.”

¹⁰ Anu ngani eshi aye anshishe kundabala icite lubumbu luyumu? Ngani eshi antanjilile kuya KuEdomu?

¹¹ Taaku abamwi sobwe, ndimwe nweenka nomwatukaka, ee, mwebo nweenka nobaLesa nomwacileka kuya abashilumamba besu kunkondo.

¹² Amutucaafwe ono kulwana balwani besu, mukwiinga lucafwo luswa kubantu taaku mbolubete!

¹³ Na mwebo nobaLesa kamuli andiswe tulaakukoma. Ncakwiila ndimwe mweshi mukatukomeneeko balwani.