Kulumbaisha 107 - Baibo Busansulushi Bwa Libuku Ili

LIBUKU LYASANU (Kulu 107—150) Lwiimbo lwakulumbaisha bubotu bwakwe Lesa

¹ Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.

² Abo Mwaami Lesa mbwaakafuna abaambe maswi aya. Ee, abaambe abo mbwaakalubula mumaansa a balwani babo.

³ Nkokwaamba ayi abo mbwaakayobolola kuswa kushishi sha baswamashi, ncakwiila kuswa kwicwe akumbo, kumatwa akumalenge.

⁴ Bamwi bakalinga kwingeelabo muluyanga lutacite nshila. Aboobo bakaalilwa kucana nshila yeenga yabatola kundabala yakwikalaamo.

⁵ Bakanyumfwa nsala anyotwa, aboobo bakatalika kuwisooka.

⁶ Lyalo bakalilila Mwaami Lesa ceebo ca mapensho abo. Ncakwiila alakwe wakabafuna kuswa mubuumba bwabo.

⁷ Ee, wakabatanjilila mumukwakwa ululeme, kuya kundabala iyo njeenga bekalaamo.

⁸ Abalumbe Mwaami Lesa ceebo ca lusuno lwakwe lutamaani, kumulumba ceebo shintu shikankamika nshaakabacitila.

⁹ Ulapa shakunwa kubaabo bafwite nyotwa, akupa shintu shibotu kubafwite nsala ayi bakute.

¹⁰ Bamwi bakalinga kwikala mumunshinshe ushiya mbi. Abo mbakaili bakalinga kupenga kabaangitwe ncetani

¹¹ ceebo bakasuula maswi akwe Lesa, akukaka milasho yakwe Lesa wa kwiculu Wiindaawo.

¹² Wakabaaba bakalinga kubakopola ancito iyumu. Bakalinga kuwa sombi tekwakalinga shikubacafwa.

¹³ Lyalo bakalilila Mwaami Lesa ceebo ca mapensho abo. Ncakwiila alakwe wakabafuna kuswa mubuumba bwabo.

¹⁴ Wakabakusha mumunshinshe ushiya mbi. Ee, wakasutoola ncetani shabo.

¹⁵ Abalumbe Mwaami Lesa ceebo ca lusuno lwakwe lutamaani, kumulumba ceebo shintu shikankamika nshaakabacitila.

¹⁶ Ulapwaya shisasa sha bulonse, akusutoola mpingilo sha nshimbi.

¹⁷ Bamwi bakaba baluya ceebo ca shibiibi shabo, alimwi bakapenga ceebo ca shilubo shabo.

¹⁸ Cakulya cili coonse cakalinga kubafundoosha kumyoyo. Ncakwiila alwalo lufu lwakabanunkila.

¹⁹ Lyalo bakalilila Mwaami Lesa ceebo ca mapensho abo. Ncakwiila alakwe wakabafuna kuswa mubuumba bwabo.

²⁰ Wakatuma liswi lyakwe akubashilika. Ee, wakabapulusha ayi batayi mucuumbwe.

²¹ Abalumbe Mwaami Lesa ceebo ca lusuno lwakwe lutamaani, kumulumba ceebo shintu shikankamika nshaakabacitila.

²² Abamuluumbe amilambu yakulumba, akwaambilisha milimo yakwe munyimbo shakusangalala.

²³ Bamwi bakeendela mumaato palweenge, kunooya busambala pamaanshi ayoosha.

²⁴ Bakabona milimo ya Mwaami Lesa, milimo yakwe ikankamika palweenge.

²⁵ Wakaambabo liswi, lyalo cipuupu cinene cakatalika. Cipuupu ico cakanyamuna maaba palweenge.

²⁶ Maato abo akanyamunwa mwiculu, lyalo akaboola panshi. Muciindi ciyoosha ico bantu bakatyongola.

²⁷ Bakapulumpunta akutalantanta anga mbantu bakoletwe cakwaamba ayi alushibo lwabo mpalampala.

²⁸ Lyalo bakalilila Mwaami Lesa ceebo ca mapensho abo. Ncakwiila alakwe wakabafuna kuswa mubuumba bwabo.

²⁹ Mwaami Lesa wakoomusha cipuupu. Aalo maaba akoomunabo tontolo.

³⁰ Bakasangalala ndibakabona ayi kwatontola. Lyalo wakabatola kucito ncebakalinga kusuni.

³¹ Abalumbe Mwaami Lesa ceebo ca lusuno lwakwe lutamaani, kumulumba ceebo shintu shikankamika nshaakabacitila.

³² Abamusumpule mulibungano lya bantu, amumulumbaishe munkuta ya bamaloba.

³³ Mwaami Lesa wakasandula milonga kuba luyanga. Wakasandula tuntupu twa maanshi kuba nshi iyumu nta.

³⁴ Cishi ca mboleshi cakaba cikula ceebo ca shibiibi sha bantu bakalingaamo.

³⁵ Wakasandula luyanga kuba shishiba sha maanshi, acishi ciyumu kuba atuntupu twa maanshi.

³⁶ Uko Mwaami Lesa nkwaakatola bantu bakalinga kufwite nsala ayi bakale nkuko. Ndushinisho bantu abo bakayaka ndabala inene yakwikalaamo.

³⁷ Bakashanga mbuto mumyuunda, akushamika minyansa, lyalo bakatebula shakulya shiinji.

³⁸ Mwaami Lesa wakabapa coolwe cakwaamba ayi bakashalana. Ncakwiila taakwe kuleka ayi shifubwa shabo shiceye.

³⁹ Ono bantu bakwe Lesa ndibakakomwa akulenshekwa nsoni, kwiinda mukulyatililwa, mumapensho alimwi amubuumba,

⁴⁰ wakacimwa baabo bakalinga kubalyatilila akubalengesha kutalika kwiingaila muluyanga mutaamu nshila.

⁴¹ Sombi bapengete wakabakusha mumapensho abo, akufusha bamumaandaabo anga ngamatanga a shifubwa.

⁴² Bantu baluleme balabona shintu ishi akusangalala, sombi bamucita shibi balo baloomunabo puti.

⁴³ Muntu woonse musongo aanyumfwe shintu ishi akuyeeya palusuno lwa Mwaami Lesa lutamaani.