Kulumbaisha 106 - Baibo Busansulushi Bwa Libuku Ili

Bubotu bwa mwaami Lesa pabantu bakwe

¹ Amulumbaishe Mwaami Lesa! Amulumbe Mwaami Lesa mukwiinga uli kabotu, ee, mukwiinga lusuno lwakwe ndwamuyayaya.

² Ngani weenga waambilisha milimo ya nkusu ya Mwaami Lesa? Ngani weenga wamulumbaisha mbwaaelete?

³ Balicite coolwe bakonkela milawo ya Mwaami Lesa, abo bacita shiluleme lyoonse.

⁴ Amunjibaluke noBaami baLesa, ciindi ndyemufwita nkumbu bantu banu. Amumfunine kumwi ndyemubapulusha

⁵ kwaamba ayi nkasangalale mukuswitilila kwa baabo mbomwakasala. Ee, kwaamba ayi anebo nkabeeko lubasu mukusangalala kwa mushobo wanu akumulumbaisha pantu pomwi abantu banu.

⁶ Twakabisha bweenka mbuli bamashali besu bakulukulu. Twakacita shilubo akweenda mububi.

⁷ Bamashali besu bakulukulu ndibakalinga muIjipiti, tabakwe kubikaako maano kushaankamiko shakacita Lesa. Bakalubaako kufula kwa mankanda ngwaakabanyumfwila nkumbu. Bakamubukila kuLweenge Lusalala lulya.

⁸ Sombi wakabafuna kweelana ambwaakabashomesha, kwaamba ayi aboneshe nkusu shakwe shiindaawo kuli mbabo.

⁹ Wakaambila Lweenge Lusalala ayi luyume, mpeeke lwakayuma nta. Wabatanjilila mulweenge ulo pamumpwampwa uyuminite anga muluyanga.

¹⁰ Wakabafuna kuswa mumaansa a baabo babapatite, ee, wakabalubula kuswa kumaansa a balwani babo.

¹¹ Sombi maanshi akafwekelesha balwani babo. Ncakwiila taaku nabi womwi wakacaala.

¹² Lyalo bene Isilaeli bakashoma kushomesha kwakwe akwiimba lwiimbo lwakumulumbaisha.

¹³ Nakubi boobo bakafwambaana kuluba shoonse nshaakacita, akutalindila ayi abalwiite nshebeelete kucita.

¹⁴ Muluyanga bakayewa shakulya abuumbi ee, muluyanga bakeelesha Lesa.

¹⁵ Aboobo wakabapa shoonse nshebakasenga, sombi wakabatumina bulwashi buyoosha.

¹⁶ Muluyanga umo bantu abo bakanyumfwila Mose munyono, pantu pomwi aAloni musebenshi usalalite wa Mwaami Lesa.

¹⁷ Lyalo cishi cakalakama akumina Datani, ee, yakafwekelesha bamuŋanda yakwe Abilamu.

¹⁸ Mulilo awalo wakalulumina bakalinga kubakonkela, ncakwiila wakatenta bantu abo babiibi.

¹⁹ KuOlebu bakabumba mucende mwaana, bakalambila cibumbwabumbwa cakabumbwa kugolodi.

²⁰ Bakashiya Lesa wabulemu akulambila cibumbwabumbwa ca mucende uyo ulya bwiisu.

²¹ Bakaluba Lesa uyo wakabafuna ndyaakacita shaankamiko mucishi ca Ijipiti.

²² Wakacita shaankamiko mucishi cakwe Amu amilimo ikankamika abuumbi kuLweenge Lusalala.

²³ Aboobo Lesa wakaamba ayi utoobanyonyoola. Sombi Mose, musebenshi wakwe ngwaakasala, wakeemikana pameenso akwe kwaamba ayi atabanyonyooli mubukali bwakwe.

²⁴ Mpomunyaawo bakanyansha cishi ico cibotu abuumbi, mukwiinga tabakwe kushoma kushomesha kwakwe Lesa.

²⁵ Bakalinga kutongooka mumatente abo, alimwi tabakwe kunyumfwila Mwaami Lesa.

²⁶ Ncakwiila lakwe wakanyamuna lyaansa lyakwe akushomesha cakulumbila ayi bantu abo balaakufwita muluyanga,

²⁷ bamulunyungu babo balaakufwita pakati ka mishobo imwi, akupalanganishilwa mushishi sheensu.

²⁸ Lyalo bantu abo bakalambila Baala, lesa wa kuPeyoli, akulya milambu yakabengwa kubalesa batayooyi.

²⁹ Bakakalasha Mwaami Lesa ceebo ca shintu nshebakacita, mpeeke mwaalu wakesa pakati kabo.

³⁰ Sombi Fineyasi wakapa mulandu bantu bakabisha, lyalo mwaalu uyo wakamana.

³¹ Paceebo ceeco kuswa paciindi ico lakwe ulabonwa ayi uliluleme nkokwaamba ayi mumashalane oonse aayo acisa.

³² Bantu aba bakakalasha Mwaami Lesa kutuntupu twa kuMeliba. Lyalo Mose wakaba amapensho ceebo ca bantu abo.

³³ Bakakalasha Mose abuumbi cakwaamba ayi wakaamba cakutamina mate.

³⁴ Tabakwe kunyonyoola baswamashi kweelana ambwaakabaambila Mwaami Lesa,

³⁵ sombi bakatalika kunyumfwana ambabo alimwi akukonkela kwishibila kwabo kubiibi.

³⁶ Bakalinga kulambila shibumbwabumbwa shabo, uko kwakaba anga nkoose kuli mbabo.

³⁷ Bakalinga kubenga bana babo basankwa abana babo banakashi kumishimu ibiibi.

³⁸ Bakatila bulowa bwa baabo batacite mulandu. Ee, bulowa bwa bana babo basankwa abanakashi abo mbobakabenga kushibumbwabumbwa shine Kenani. Bucayi ubo bwakacitika bwakabisha cishi ico coonse.

³⁹ Mboboobo mbobakalibisha kushintu nshebakacita, alimwi tabakwe kushomeka kuli Lesa mukucita sha mushobo uyo.

⁴⁰ Aboobo Mwaami Lesa wakakalalila bantu bakwe. Ee, bantu mbwaakasala bakamufundoosha kumoyo.

⁴¹ Mpeeke wakabaaba mumaansa a baswamashi, lyalo balwani babo bakabeendelesha.

⁴² Balwani babo abo bakabalyatilila bakabakoma akubeendelesha cakumaninina.

⁴³ Mankanda maanji Mwaami Lesa wakalinga kubafuna, sombi balo bakalinga kumubukila cakutacilekaawo. Paceebo ceeco shibiibi shabo shakeendaawo kufula.

⁴⁴ Nakubi boobo Mwaami Lesa wakanyumfwa kulila kwabo alimwi wakabona buumba bwabo.

⁴⁵ Mukubacafwa wakeebaluka cipangano cakwe, alimwi ceebo ca lusuno lwakwe lutamaani wakabooshaamo moyo.

⁴⁶ Lyalo wakalengesha bantu abo myoyo kubomba, abo bantu bakalinga babacata busha.

⁴⁷ NoBaami baLesa, baLesa besu amutufuneeko. Mutubunganye kuswa kumishobo iimbi, kwaamba ayi tulumbe liina lyanu lisalalite akumulumbaisha abuumbi.

⁴⁸ Aalumbaishikwe Mwaami Lesa, Lesa wa bene Isilaeli. Amumulumbaishe lyoonse alyoonse. Bantu boonse abaambe ayi, “Ameni!” Aalumbaishikwe Mwaami Lesa!