Kulumbaisha 105 - Baibo Busansulushi Bwa Libuku Ili

Lesa abantu bakwe

¹ Amulumbe Mwaami Lesa, amumulambile mukwiita liina lyakwe. Amupukishe nshaakacita kumishobo yoonse.

² Amumwiimbile, amwiimbe nyimbo shakumulumbaisha, amushimike isho shoonse shikankamika nshaakacita.

³ Amusangalale akulambila liina lyakwe lisalalite. Ncakwiila myoyo ya bantu boonse bamulambila aisangalale.

⁴ Amulangilishe kuMwaami Lesa akusenga nkusu shakwe. Amulambile Mwaami Lesa cakutacilekaawo.

⁵ Kamwiibaluka shitondesho sha nkusu sha kwiculu nshaakacita, shankamiko shakwe alimwi abupingushi mbwaakapa.

⁶ Kamushiibaluka nobamulunyungu lwakwe Abulaamu musebenshi wakwe, Nobamulunyungu lwakwe Jakobo, mwebo nomwakasalwa.

⁷ Mwaami Lesa, ngoLesa wesu, milawo yakwe ili mucishi ca panshi coonse.

⁸ Ulaakulama cipangano cakwe kwalyoonse alyoonse, ee, kushomesha kwakwe mumashalane ali cuulu.

⁹ Ulaakulama cipangano ncaakapanga aAbulaamu, kushomesha nkwaakaamba kuli Isaki.

¹⁰ Cipangano ico wakacipanga aJakobo ayi ngumulawo, wakacipanga ayi ncamuyayaya kubene Isilaeli.

¹¹ Wakaamba ayi, “Ndaakukupa cishi ca Kenani kwaamba ayi cikabe caako.”

¹² Bantu bakwe Lesa bakalinga baniini, bakalinga mbeensu mucishi ca Kenani.

¹³ Bakeenda kuswa mucishi comwi akuya mucishi cimwi, kuswa mubuleelo bomwi akuya mubuleelo bumwi.

¹⁴ Sombi Lesa taakwe kusuminisha uli woonse kubalyatilila. Ceebo ca mbabo wakalinga kukalalila bamaami.

¹⁵ Wakalinga kubaambila ayi, “Mutaciisi bantu bangu mbondakasala, Muteeleshi kucata balaluki bangu.”

¹⁶ Mwaami Lesa wakaleta nsala mucishi cabo akunyonyoola shakulya shabo shoonse.

¹⁷ Sombi wakatuma muntu kunembo lyabo. Uyo wakalinga Josefu wakoolishikwa busha.

¹⁸ Bakamwaanga ncetani kumyeendo amwalo munshingo yakwe bakaangamo nshimbi

¹⁹ tibili isho nshaakaamba ndishakacitika cancinencine, ee, tibili maswi aMwaami Lesa ndyaakatondesha ayi taakwe kubeca.

²⁰ Mwaami wa kuIjipiti wakatuma muntu ayi amwaangulule, ee, muleli wa mishobo wakamwaangulula.

²¹ Cishi cakwe coonse wakacibika mumaansaakwe. Wakamupa bweendeleshi bwa buboni bwakwe boonse.

²² Wakamupa bweendeleshi pabacinenenene bakwe, alimwi ankusu shakupa busongo beshikumupandako maano.

²³ Lyalo Isilaeli wakesa muIjipiti, Ee, Jakobo wakekala kaali mweensu mucishi cakwe Amu.

²⁴ Mwaami Lesa wakalengesha bantu bakwe kushalana. Wakabalengesha kufula kwiinda balwani babo,

²⁵ abo mbwaakalengesha ayi bapatane abantu bakwe, ee, abo bakalinga kupinga kulyatilila basebenshi bakwe.

²⁶ Wakatuma Mose musebenshi wakwe, alimwi aAloni uyo ngwaakasala.

²⁷ Bakacita milimo ya nkusu yakwe Lesa pameenso abo akucita shaankamiko mucishi cakwe Amu.

²⁸ Wakaleta munshinshe pali mbabo akubalubya. Nakubi boobo bene Ijipiti tabakwe kucita kweelana amaswi akwe.

²⁹ Wakasandula maanshi abo kuba bulowa, wakalengesha inswi ayi shimane kufwa.

³⁰ Mucishi cabo mwakeesula babombwe, abo bakalinga kusotokela amuŋanda ya bwaami.

³¹ Wakaambabo aliswi lyalo baloonshi baanji bakesa, alimwi kwakaba ampobe shiinji mucishi coonse.

³² Wakabaloshesha mfula ya mabwe. Mucishi cabo coonse mwakalinga kubeka kwa mfula.

³³ Wakatyoloola shisamu sha minyansa ashisamu sha nkuyu, akunyonyoola shisamu shoonse mucishi cabo.

³⁴ Wakaambabo liswi, lyalo nsoshi shiinji shakesa, ncakwiila nsoshi shitabelengeki.

³⁵ Nsoshi isho shakalya shoonse shakalinga kumenete mucishi cabo, ncakwiila shakalya shishango shabo shoonse.

³⁶ Mwaami Lesa wakacaya baana babo basankwa bakwiiya boonse. Ee, bakacaya baana basankwa bataanshi boonse mucishi cabo.

³⁷ Mwaami Lesa wakakusha bene Isilaeli mucishi ca Ijipiti. Bakanyamuna golodi asilifa. Pakati kabo taaku wakalinga kulefukite.

³⁸ Bene Ijipiti bakakondwa bene Isilaeli ndibakaya, mukwiinga bakalinga kubaloonda abuumbi.

³⁹ Mwaami Lesa wakabika likumbi kwaamba ayi lifwekelele bantu bakwe. Wakabika mulilo kwaamba ayi unoobamunikila mashiku.

⁴⁰ Bakasenga cakulya, lyalo Mwaami Lesa wakabapa bakancele, wakabapa cakulya cakaswa kwiculu kwaamba ayi bakute.

⁴¹ Wakacalula mwaandami, lyalo maanshi akaswa. Akakunka anga ngumulonga kuya muluyanga.

⁴² Ceebo wakeebaluka kushomesha kwakwe kusalalite, uko nkwaakalumbila kuli Abulaamu musebenshi wakwe.

⁴³ Munshila iyi wakakusha bantu bakwe cakusangalala. Bantu abo mbwaakasala bakeemba akoolobesha cakukondwa.

⁴⁴ Wakabapa shishi sha baswamashi, bakabwesa buboni bwakaswa munkasaalo ya bamwi.

⁴⁵ Wakacita boobo kwaamba ayi bakonkele milasho yakwe, alimwi akulama milawo yakwe yoonse. Amulumbaishe Mwaami Lesa!