Kulumbaisha 104 - Baibo Busansulushi Bwa Libuku Ili

Kulumbaisha mwaami Lesa mulengi

¹ Omoyo wangu lumbaisha Mwaami Lesa! NoBaami baLesa, baLesa bangu, muli beshinkusu abuumbi. Ncakwiila mulifwete bwaami alimwi abulemu.

² Mulalifweka mumuni anga ncakulifweka. Mulafungulula liculu anga nitente.

³ Mwakayaka ŋanda yanu peculu lya maanshi a kwiculu. Mulasebensesha makumbi anga shikoci shanu sha nkondo. Muleendela pamapapaminwa a muuwo.

⁴ Mulasebensesha muuwo anga mbeshinkombe banu, mulilo ubilima anga mbobasebenshi banu.

⁵ Mwakabika cishi ca panshi palwiimbi lwa ncico, alimwi teshi cikatenkaane.

⁶ Mwakacifwekelesha alweenge anga ngumungaanjo. Ncakwiila maanshi akafwekelela atulundu tulaamfu.

⁷ Maanshi ayo mwakaakalalila, aalo akacica. Akacica ndyaakanyumfwa liswi lyanu.

⁸ Akakunka kuswa patulundu akushika mushinyika. Akashika kumusena uyo ngomwakaabambila.

⁹ Mwakabikila manyinsa ngwatakoonshi kwiindilila, kwaamba ayi atakafwekeleshiwo tubili cishi ca panshi.

¹⁰ Mulalengesha tuntupu kukusha maanshi ayo akunkila mushinyika. Mulalengesha milonga kukunkila pakati ka tulundu.

¹¹ Ilapa maanshi kubanyama bamuluundu, ee, mbongolo sha muluundu shoonse shilanwa muli njiyo.

¹² Mushisamu shili pafwaafwi amaanshi, bayuni balapangaamo shiinswa akwiimba mumisampi ya nshisho.

¹³ Mulalosha mfula patulundu kuswa nkomwikala. Cishi ca panshi cilesushikwa ashoolwe shanu.

¹⁴ Mulalengesha mweemfu wakulya ŋombe kukula alimwi ashishango isho bantu nshebalima kwaamba ayi kuswa mubulongo bacane shakulya,

¹⁵ waini wakusangalasha myoyo yabo, mafuta a olifi akubakondelesha alimwi ashinkwa wakubapa nkusu.

¹⁶ Shisamu sha Mwaami Lesa shilatililwa cakushikaawo nkokwaamba ayi shisamu sha sida sha kuLebanoni isho nshaakashanga.

¹⁷ Bayuni balapanga shiinswa umo ashalo nkobokobo shilekala mushisamu sha mapaini.

¹⁸ Mpongo sha muluundu shilekala mutulundu tulaamfu, abalo bacibila balayuba mumpako sha mumyaandami.

¹⁹ Mwakalenga mweenshi ayi unootondesha shiindi, alimwi lisuba alyalo lilishi ciindi ndyelipila.

²⁰ Mwakalenga munshinshe kwaamba ayi ube mashiku, banyama bamuluundu ndibaswa akuya ceenda.

²¹ Nkalamu shilabuluma ndyeshiya cifwima, kuya ciyandoola cakulya ico Lesa ncaashipa.

²² Na lisuba lyaswabo shilaboolela nkoshoona, shilaya cakufwambaana kuboolela kushimfwengo sha nshinsho.

²³ Lyalo bantu balaya kumilimo yabo, akusebensa kushikila macolesha.

²⁴ NoBaami baLesa, mwakalenga shintu shiinji! Ncakwiila shoonsebo mwakashilenga amaano! Ee, cishi ciliswitebo shilengwa shanu.

²⁵ Kuli lweenge lunene lutandabukite, uko kucanika shilengwa shitabelengeki, ee, shilengwa shiyoya shinene ashiniini.

²⁶ Maato alaya akuboola peculu lya lweenge ulo. Mulweenge umo mwakabikaamo Lefiyatani, shinshimwe uyo ngomwakalenga ayi anoomusangalasha.

²⁷ Shoonse ishi shilangilisha kuli ndimwe kwaamba ayi mushipe cakulya paciindi ceelete.

²⁸ Na mwashipa cakulya shilashilya. Mwamana kushipa shakulya shilakuta.

²⁹ Na mwashifutatila shilaloonda abuumbi, Na mwashinyaya muuya wanu shilafwa, shilaboolela kubulongo uko nkoshakaswa.

³⁰ Sombi na mwashipa muuya wanu shilaba abuumi. Ncakwiila mulapa buumi kucishi ca panshi coonse.

³¹ Bulemu bwa Mwaami Lesa abukalilile kwalyoonse alyoonse! Mwaami Lesa aasangalale pashintu nshaakalenga!

³² Na walangilisha cishi ca panshi acalo cilatenkaana. Na wakumya tulundu atwalo tulasunta.

³³ Ndaakunookwiimbila Mwaami Lesa kwabuumi bwangu boonse. Ndaakunookwiimbila Lesa wangu cakumulumbaisha kulila kaancili muumi.

³⁴ Miyeeyo yangu yoonse aimusangalashe mukwiinga kukondwa kwangu kulaswa kuMwaami Lesa.

³⁵ Bamucita shibi abanyonyoolwe mucishi ca panshi cino. Ncakwiila beshikubisha abalobe cakumaninina. Omoyo wangu lumbaisha Mwaami Lesa! Aalumbaishikwe Mwaami Lesa!