Kulumbaisha 103 - Baibo Busansulushi Bwa Libuku Ili

Lusuno lwa mwaami Lesa

Lwiimbo lwakwe Defedi.

¹ Omoyo wangu lumbaisha Mwaami Lesa! Obuumi bwangu boonse lumbaisha liina lyakwe lisalalite!

² Omoyo wangu lumbaisha Mwaami Lesa! Utalubiiko nkumbu shakwe shoonse.

³ Ulalekelela shibiibi shangu shoonse, alimwi ulashilika malwashi angu oonse.

⁴ Ulafuna buumi bwangu kutaya mucuumbwe, ulamfwalika mushini wa lusuno ankuumbu.

⁵ Ngoompa shintu shibotu ayi nkute kwaamba ayi noocilinyumfwa anga ngumuumbankwashi.

⁶ Mwaami Lesa uloombolosha cabululami. Ncakwiila balyatililwa ulabacitila sheelete.

⁷ Wakayubulwita Mose nshila shakwe, akubonesha bene Isilaeli milimo yakwe ya nkusu.

⁸ Mwaami Lesa ngushinkumbu alimwi ngushiluse. Lakwe taakalali bwaangu alimwi lusuno lwakwe talumaani.

⁹ Taakalalili bantu kwalyoonse. Ncakwiila bukali bwakwe bulamana.

¹⁰ Taatupi milandu kweelana ashibiibi shesu, nabi kutubooshela cishole kweelana ashilubo shesu.

¹¹ Bweenka mbuli liculu mbolili kulaale kuswa panshi, mbweeke ubo lusuno lwakwe mbolubete kukomena kubaabo bamulemeka.

¹² Bweenka mbuli kumbo akwicwe mbokutalamukene, mbweeke ubo shibiibi shesu mbwaashitalamusha kuswa kuli ndiswe.

¹³ Bweenka mbuli mushali musankwa mbwaanyumfwila nkumbu kubana bakwe, mbweeke ubo Mwaami Lesa mbwaanyumfwila nkumbu abo bamulemeka.

¹⁴ Ceebo ulishi mbwaakatulenga, ulishi ayi twakaswa kubulongo.

¹⁵ Sombi swebo, buumi bwesu bulibo anga mbwiisu. Tulakula akunemfuma anga ndiluba lya muluundu.

¹⁶ Muuwo na walipuupila, liluba ilyo lilayuma. Lyalo talibonekiwo tubili mumusena wa ndilyo.

¹⁷ Sombi lusuno lwa Mwaami Lesa ndwamuyayaya kubaabo bamulemeka. Ulatondesha bululami bwakwe akubamulunyungu lwabo boonse.

¹⁸ Bantu abo mbobalama cipangano cakwe. Ee, abo bakonkela milawo yakwe cakushomeka.

¹⁹ Mwaami Lesa wakabamba cuuna cakwe ca bwaami kwiculu, alimwi bweene bwakwe bulalela shintu shoonse.

²⁰ Amulumbaishe Mwaami Lesa nobaanjelo bakwe beshinkusu, mwebo nomukonkela milawo yakwe akunyumfwila maswi ngaamwaambila.

²¹ Amulumbaishe Mwaami Lesa nomakoto akwe a kwiculu. Ee, amumulumbaishe nobasebenshi bakwe bacita kuyanda kwakwe.

²² Amulumbaishe Mwaami Lesa noshilengwa shakwe shoonse ncakwiila shoonse shili mubweene bwakwe. Omoyo wangu lumbaisha Mwaami Lesa!